Zań jobasynyń maqsaty - bilim berý jáne densaýlyq saqtaý salalaryndaǵy memlekettik kásiporyndar qyzmetiniń ashyqtyǵyn arttyrý
ASTANA. Qyrkúıektiń 15-i. QazAqparat - Úkimet elimizdiń keıbir zańnamalyq aktilerine bilim berý jáne densaýlyq saqtaý salalaryndaǵy memlekettik kásiporyndar máseleleri boıynsha túzetýlerdi engizýdi qajet dep taýyp otyr. Osy oraıda daıyndalǵan zań jobasy Májilis depýtattarynyń qolyna tıdi,
dep habarlaıdy QazAqparat.
Zań jobasyn qabyldaýdyń maqsaty ekonomıkanyń memlekettik sektoryna korporatıvtik basqarý elementterin engizý, bilim berý jáne densaýlyq saqtaý salalaryndaǵy memlekettik kásiporyndar qyzmetiniń ashyqtyǵyn arttyrý arqyly respýblıkada zańnamalardy jetildirý bolyp tabylady.
Bilim berý jáne densaýlyq saqtaý salalaryndaǵy memlekettik kásiporyndarda qadaǵalaý keńesterin qurý jolymen olarda korporatıvtik basqarý elementterin engizý memlekettik kásiporyn men onyń basshylyǵynyń qyzmetine memlekettik baqylaýdy kúsheıtýge yqpal etedi.
Zań jobasyn qabyldaý sharýashylyq basqarý quqyǵyndaǵy memlekettik kásiporynnyń uıymdastyrý-quqyqtyq nysanynda qurylǵan bilim berý jáne densaýlyq saqtaý uıymdarynda qoǵamdyq baqylaý prıntsıpterin engizýdiń quqyqtyq negizderin aıqyndaýǵa múmkindik jasaıdy.
Zań jobasynda qadaǵalaý keńesiniń quzyreti, onyń memlekettik basqarý organymen jáne memlekettik kásiporyn basshysymen ózara is-qımylynyń tártibi jáne olardyń jaýapkershiligi belgilenedi, Qazaqstan Respýblıkasy Úkimetiniń qadaǵalaý keńesine, atap aıtqanda, qadaǵalaý keńesin qurý jáne saılaý tártibin bekitýge, qadaǵalaý keńesiniń tóraǵasy men múshelerin saılaýǵa qatysty quzyreti aıqyndalady.
Zań jobasyn qabyldaý bilim berý jáne densaýlyq saqtaý salalaryndaǵy memlekettik kásiporyndarda korporatıvtik basqarý protsesinde týyndaıtyn qatynastardy retteýdiń quqyqtyq negizin qurýǵa múmkindik beredi.
