Zań jobasynyń qabyldanýy qoǵamdyq keńes jumysyn jańa deńgeıge kóteredi - Sembek Seıdazimov
TARAZ. QazAqparat - Qoǵamdyq keńester týraly zań jobasyna Memleket basshysy Qasym-Jomart Toqaevtyń qol qoıǵandyǵy týraly jaqsy jańalyqty bizder, qoǵamdyq keńester ókilderi úlken rızashylyǵymyzben qabyldadyq, -dedi óz sózinde Taraz qalalyq Qoǵamdyq keńesiniń tóraǵasy Sembek Seıdazimov.
Qoǵamdyq keńester zań jobasynyń talqylaýyna belsendi túrde qatysty. Qoǵamdyq keńesterdiń qurylǵan ýaqytynan bastap jergilikti jerde jınaqtalyp qalǵan kóptegen máseleler, qoǵamdyq keńester tarapynan berilgen birshama usynystar osy zańnyń aıasynda sheshimin taýyp otyr.
«Zańmen qarastyrylyp otyrǵan jańa normalardyń barlyǵyn qyzý qoldaımyz. Sondaı-aq, Zańnyń der kezinde qabyldanýy qoǵamdyq keńesterdiń qyzmetin odan ári ońtaılandyryp, jańa deńgeıge kóteredi degen senimimiz bar.
Onyń ishinde, ásirese qoǵamdyq keńester qyzmetin uıymdastyrý barysynda birshama baǵyttar boıynsha qarjylandyrýdyń qarastyrylýy óte quptarlyq jaǵdaı», dep atap ótti qalalyq Qoǵamdyq keńes tóraǵasy.
Sonymen qatar, Sembek Ábitaıuly óz sózinde, Qoǵamdyq keńestiń hatshy birligi men onyń eńbek aqysynyń sheshilýi, sarapshylarǵa, keńse shyǵystaryna qajetti qarjynyń qarastyrylýy qoǵamdyq keńester jumysyna tek oń áserin tıgizedi.
«Bul túzetýlerdiń zań jobasymen maquldanýynyń ózin bizder qoǵamdyq keńesterge memleket tarapynan kórsetiletin úlken qoldaýdyń belgisi retinde qabyldaımyz», dep atap ótti ol.
