Zań jobasynyń eń negizgi maqsaty - memleketimizdiń energetıkalyq qaýipsizdigin turaqtandyrý - Májilis depýtaty T. Ibraev
ASTANA. 15 mamyr. QazAqparat - Zań jobasynyń eń negizgi maqsaty - memleketimizdiń energetıkalyq qaýipsizdigin turaqtandyrý.
Bul pikirdi keshe magıstraldyq qubyrlarǵa qatysty zań jobasy boıynsha qurylǵan jumys tobynyń múshesi, Májilis depýtaty Tólegen Ibraev jýrnalısterge bergen suhbatynda aıtty.
«Táýelsizdik alǵan kezimizde biraz dúnıeni zańdarymyzben bekitip tastaýǵa shamamyz da kelmegen shyǵar, basqa da jaǵdaılar áser etken bolar, eskermegen jaıttar boldy. Endi sol retke keltirýge tıis máselelerdi jónge keltirý maqsatynda zańdarǵa ózgerister engizilip jatyr. Zań jobasynyń eń negizgi maqsaty - memleketimizdiń energetıkalyq qaýipsizdigin turaqtandyrý. Sondaı-aq magıstraldyq qubyrlar tóńiregindegi qyzmetterge sheteldik ınvestıtsııalar salynady. Osy sala boıynsha shetelden keletin ınvestıtsııanyń kólemin ulǵaıtatyn bolsaq, memleketimizdiń ári qaraı damı berýine yqpal etetini sózsiz. Bul zań jobalary soǵan negiz bolmaq»,- dedi depýtat Tólegen Ibraev.
Depýtat zań jobasynyń áleýmettik jaǵyna da toqtaldy. Máselen, árbir adamnyń jeke menshiginde kóligi bar, qoǵamdyq kólikter bar. Osy avtokólikterge janar-jaǵarmaı jetpeı jatady. Nemese onyń baǵasy ósip ketedi. Tólegen Ibraevtyń pikirinshe, ilespe zań jobasy arqyly úsh kodekske, bes zańǵa ózgerister engizý nátıjesinde salystyrmaly túrde turaqty baǵamen qamtamasyz etýge yqpal etetin bolady.
Sonymen qatar zań jobasynyń ekologııalyq zardaptardyń aldyn alýǵa qatysty jaǵy da bar. «Buǵan deıin qoldanylyp kelgen zańdar bólek-bólek bolsa, endi osy magıstraldyq qubyrlarǵa qatysty máseleler bir zań aıasynda biriktirilip otyr. Depýtattardyń engizgen usynystary boıynsha jumys tobynda zań jobasy biraz ózgeristerge enýi múmkin. Al zań jobasy Májilistiń jalpy otyrysynda talqylanǵan kezde úlken jumystyń oryndalǵanyn baıqaýǵa bolady dep esepteımin»,- dedi T. Ibraev.
