Zań jobasynda qylmystyq jaýapkershilik bastalatyn jasty 14-ten 16-ǵa deıin ulǵaıtý kózdelip otyr
ASTANA. Naýryzdyń 2-si. QazAqparat - Májilistiń Zańnama jáne sot-quqyqtyq reforma komıteti keıbir zańdarǵa balanyń quqyqtaryn qorǵaýdy qamtamasyz etýge qatysty túzetýler engizýdi kózdeıtin zań jobasyn jan-jaqty qarap shyǵyp, bas komıtet retinde óz qorytyndysyn berdi,
dep habarlaıdy QazAqparat.
«Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaýdy qamtamasyz etý máseleleri boıynsha ózgerister men tolyqtyrýlar engizý týraly» zań jobasyn qaraý barysynda Májilis depýtattary 100-ge jýyq túzetý bergen, olardyń bir bóligi qabyldanyp, salystyrma kestege engizilgen. Zań jobasy birinshi oqylymda talqyǵa salýǵa daıyn.
Atalǵan zań jobasymen Qylmystyq, Qylmystyq is júrgizý kodeksterine, Qazaqstan Respýblıkasynyń Ákimshilik quqyq buzýshylyq týraly kodeksine, sondaı-aq «Qazaqstan Respýblıkasyndaǵy balanyń quqyqtary týraly» jáne «Kámeletke tolmaǵandardyń arasyndaǵy quqyq buzýshylyqtar men balalardyń qadaǵalaýsyz jáne panasyz qalýynyń aldyn alý týraly» Qazaqstan Respýblıkasynyń zańdaryna ózgerister men tolyqtyrýlar engizilip otyr.
Túzetýler balanyń quqyqtaryn qorǵaýdy qamtamasyz etý jáne kámelettik jasqa tolmaǵandarǵa qatysty quqyq buzýshylyqtyń aldyn alý salasyndaǵy ulttyq zańnamany odan ári jetildirýge baǵyttalǵan. Atap aıtqanda, zań jobasynda urlyq, tonaý jáne bopsalaýshylyq jasaǵany úshin qylmystyq jaýapkershilik bastalatyn jasty 14-ten 16-ǵa deıin ulǵaıtý kózdelgen. Kámelettik jasqa tolmaǵan balany jezókshelikpen aınalysýǵa tartqany úshin jaýaptylyq kózdelgen bap engiziledi, kámeletke tolmaǵan balanyń erotıkalyq sıpattaǵy materıaldardy satýyna tyıym salynady.
