Zań jobasyn qabyldaý saýda qyzmetin retteý protsesinde týyndaıtyn qatynastardy retteýdiń tıimdi júıesin qurýǵa múmkindik beredi
ASTANA. Jeltoqsannyń 25-i. QazAqparat /Aıdyn Báımen/ - Alǵa qoıylǵan ekonomıkalyq mindetterge qol jetkizý maqsatynda memleket syrtqy jáne ishki naryqtardaǵy ótkir básekelestikke daıyn bolýy tıis.
Osy maqsatta Úkimet «Qazaqstan Respýblıkasynyń keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasyn ázirlep, Májilistiń qaraýyna berdi, dep habarlaıdy QazAqparat.
Saýda saıasaty, onyń ishinde saýda qyzmetin tıimdi retteý kózdegen maqsattarǵa qol jetkizý quraly bolyp tabylady. Óıtkeni álemniń kez kelgen eliniń ekonomıkalyq tabysy kóp jaǵdaıda saýda sektorynyń damýymen baılanysty bolady. Osylaısha jahandanýǵa tek otandyq óndirýshiler ǵana emes, memlekettiń ózi de daıyn bolýǵa tıis.
Álemniń kez kelgen eli sııaqty Qazaqstannyń da ózgermeli ishki jáne syrtqy jaǵdaılarǵa sáıkes keletin jáne jahandanýdyń keleńsiz faktorlary men qaterlerin azaıta otyryp, odan túsetin paıdany barynsha arttyrýǵa múmkindik beretin saýda qyzmetin retteýdiń naqty pysyqtalǵan óz júıesi bolýǵa tıis. Osyǵan baılanysty saýda qyzmetin retteýge qatysty zań jobasy ázirlenip otyr.
Zań jobasyn ázirleý qajettiligi saýda qyzmeti salasyndaǵy qoldanystaǵy ulttyq zańnama saýda operatsııalaryn damytýdyń yntalandyrý nemese qoldaý sıpatynan góri, retteý sıpatyna ıe ekendiginen týyndaǵan.
Zań jobasy boıynsha «Taýarlardyń ımporty jaǵdaıynda ishki rynokty qorǵaý sharalary týraly» zańǵa redaktsııalyq sıpattaǵy túzetýler engiziledi. Sonymen qatar «Lıtsenzııalaý týraly» zańǵa tarıftik kvotalar, sandyq shekteýler, baqylaý jáne áketý men ákelýge arnalǵan aıryqsha quqyq qoldanylatyn taýarlardyń ımportyna lıtsenzııalaýdy belgileý bóliginde ózgerister engizýdi kózdeıdi. Sol sekildi «Saýda qyzmetin retteý týraly» zańǵa da tolyqtyrýlar qarastyrylyp otyr.
Eldiń syrtqy saýda qyzmetin damytý maqsatynda qazaqstandyq taýarlardyń, usynylatyn jumystar men qyzmetterdiń eksportyn damytý jáne jyljytý jóninde ereje kózdelgen.
Eksportty damytý jáne jyljytý jónindegi ulttyq uıymnyń quqyqtyq mártebesi, maqsattary men mindetteri de aıqyndalǵan. Ulttyq uıymnyń negizgi mıssııasy memleket pen jeke sektor arasyndaǵy uıymdastyrýshylyq, úılestirý jáne baılanystyrýshy rólin oryndaı otyryp, ınstıtýtsıonaldyq qoldaý júıesin qurý bolyp tabylady.
Eksportty damytý jáne jyljytý jónindegi ulttyq uıymnyń maqsattary men mindetterin Qazaqstan Prezıdentiniń 2006 jáne 2007 jyldardaǵy shıkizattyq emes eksportty servıstik qoldaý ınstıtýtyn qurý qajettiligi týraly Joldaýlaryn oryndaý úshin qurylǵan «KAZNEH» eksportty damytý jáne jyljytý korporatsııasy» aktsıonerlik qoǵamy oryndaıtyn bolady.
«KAZNEH» tujyrymdamasy Qazaqstan Úkimeti janyndaǵy Indýstrııalyq-ınnovatsııalyq damý salasyndaǵy memlekettik basqarý máseleleri jónindegi mamandandyrylǵan keńestiń 2006 jyly qarashanyń 27-sinde ótken otyrysynda maquldandy.
Eksportty damytý jáne jyljytý jónindegi memlekettik sharalardy iske asyrý respýblıkalyq bıýdjetten qarajat bólýdi talap etetindigin atap ótý kerek. Respýblıkalyq bıýdjet komıssııasynyń 2009 jylǵy maýsymnyń 17-sindegi hattamasyna sáıkes osy is-sharalardy ótkizýge 300 mln teńge mólsherindegi qarjy bólý máselesi maquldandy.
Zań jobasymen saýda qyzmetiniń sýbektilerine, taýarlarǵa, jabdyqtarǵa, saýda obektilerin ustaýǵa qoıylatyn talaptardy belgileý men saýda núktelerin júıelendirýdiń, sondaı-aq olardyń qyzmetterin reglamentteý men retteýdiń qajettiligine baılanysty saýda qyzmetin uıymdastyrý bóliginde tolyqtyrýlar engiziledi.
Osylaısha zań jobasyn qabyldaý saýda qyzmetin retteý protsesinde týyndaıtyn qatynastardy retteýdiń tıimdi júıesin qurýǵa múmkindik beredi. Zań jobasyn qabyldaý teris áleýmettik-ekonomıkalyq saldarǵa ákep soqtyrmaıdy.
Bul zań jobasy boıynsha Májilistiń Ekonomıkalyq reforma jáne óńirlik damý komıteti jumys tobyn qurady jáne qorytyndy ázirleıtin bolady.
