Zań jobasy: júrgizýshiler aıyppuldy táýlik ishinde tólese, tek 50 paıyzyn ǵana óteýi yqtımal
ASTANA. QazAqparat - Búgin Parlament Senatynyń jalpy otyrysynda palata depýtattary «Jol júrisi týraly» zań jobasyn birinshi oqylymda maquldady.
Atalǵan qujat jol qozǵalysyn tıimdi uıymdastyrýdy arttyrýǵa, jol qozǵalysy úderisterin basqarýdyń memlekettik júıesin jetildirýge baǵyttalady. Zań jobasynda múddeli memlekettik organdardyń jol júrisi qaýipsizdigin qamtamasyz etýdegi quzyreti men mindetteri aıqyndalady. Budan bólek, zań jobasy aıasynda elimizde jol qaýipsizdigi aýdıt ınstıtýtyn engizý kózdeledi. Bul ınstıtýt adamı faktordan bolatyn jol apattaryn azaıtýǵa septigin tıgizbek.
Aýdıt ınstıtýty negizinen der ýaqytynda ózgerister engizý úshin jobalaý kezeńinde nemese qurylystyń bastapqy kezeńderinde joldyń tehnıkalyq jobasyndaǵy qaýipsizdik qaýpin anyqtaýǵa múmkindik beredi. Al saraptama barysynda usynylatyn jańa nemese jańartylǵan jol ashylǵannan keıin ony paıdalaný deńgeıi baǵalanady.
«Jalpy zań jobasynyń maqsaty jol qozǵalysymen baılanysty barsha bazalyq máselelerdi quqyqtyq retteý úshin irgeli zańnamalyq negiz qalyptastyrý bolyp tabylady. Onyń ishinde halyqaralyq mindettemelerden týyndaıtyn sharalar da qamtylmaq. Jol qozǵalysyn qamtamasyz etý barysynda memlekettik organdardyń quzyretin naqty aıqyndaý qarastyrylady. Budan bólek, jol qozǵalysyna qatysýshylardyń quqyqtary men mindetteri bekitilip, onda azamattardyń quqyǵyn shekteıtin jáne qorǵaıtyn normalar qamtylyp otyr», - dedi zań jobasy boıynsha baıandaǵan Іshki ister mınıstri Qalmuhanbet Qasymov.
Mınıstrdiń aıtýynsha, qujat boıynsha kólik quraldaryna, olarǵa tehnıkalyq qyzmet kórsetý talaptaryna qatysty normalar jeke qarastyrylyp otyr. «Kólikti basqarýǵa ruqsat beretin qujat BUU tujyrymdamasynyń talaptaryna sáıkes bolady. ıAǵnı, júrgizýshi kýálikteriniń jańa túrleri engiziledi. Onda 7 sanat pen 6 sanattyń tarmaqshalary qamtylady», - dedi mınıstr.
Budan bólek, aıyppul salýlarda da birshama ózgerister qaralady. Máselen, aıyppul eger salynǵan ýaqytynan bir táýlik ishinde tólense onyń mólsheriniń 50 paıyzyn ǵana óteý, eger apta ishinde tólense onyń 30 paıyzyn azaıtý kózdeledi. Múgedekterge arnalǵan oryndarǵa avtokólikterdi toqtatýǵa, kólikpen toqtaýǵa qatysty erejeni buzǵany úshin ákimshilik jaýapkershilik qarastyrylady. Júrgizýshilerdi daıarlaý tártibin buzǵandarǵa da jaýap qataıady. «Jol qozǵalysy salasyndaǵy erejelerdi júıeli túrde buzǵandarǵa da jaýapkershilik kúsheıtiledi. Máselen, baǵdarshamnyń tyıym salynǵan belgisin úsh ret elemeı ótkender júrgizýshi kýáliginen jarty jylǵa deıin aıyrylady. Al mas kúıinde kólikti basqarǵandar birinshi ret ustalsa júrgizýshi kýáliginen 3 jylǵa (qazirgi merzim 2 jyl), ekinshi ret 7 jylǵa kýálikten aıyrylady jáne 15 táýlik ákimshilik qamaýǵa alynady, úshinshi ret ustalǵandar 30 táýlik ákimshilik qamaýǵa alynyp, júrgizýshi quqyǵynan 15 jylǵa deıin aıyrylady», - deıdi ІІM Q. Qasymov.
