Zań jobasy: Úlken kólemdi egistik jerleri «bir qolǵa» berilmeıdi
ASTANA. QazAqparat - Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat.
«Jerdi paıdalaný men qorǵaýǵa memlekettik baqylaýdy kúsheıtý maqsatynda zań jobasymen aýdandyq ákimdikterdiń quzyretine aýyl sharýashylyǵy jerlerin memlekettik baqylaýdy júrgizý boıynsha fýnktsııa berý qarastyrylyp otyr. Aýyl sharýashylyǵy jerlerin úlken kólemde «bir qolǵa» berilýin boldyrmaý maqsatynda zań jobasynda ár oblystyń ákimshilik aýdandary (qalalary) sheginde aýyl sharýashylyǵy jerleriniń shektik mólsherin belgileý kózdelgen. Bul rette, oblystyń birneshe aýdandarynan nemese birneshe oblystardan alynǵan aýyl sharýashylyǵy jerleriniń jalpy alańy «bir qolǵa» beriletin respýblıka boıynsha belgilengen shekti (eń joǵarǵy) mólsherden aspaýy shart. Bir qolǵa beriletin jerlerdiń mólsheri maslıhattar men atqarýshy organdardyń birlesken usynysynyń negizinde Úkimetpen bekitiledi», - dep atap ótti QR Premer- Mınıstriniń orynbasary - Aýyl sharýashylyǵy mınıstri Asqar Myrzahmetov.
Onyń sózine qaraǵanda, QR AShM aýyl sharýashylyǵy jerleriniń shektik mólsherin aıqyndaý úshin tıisti Esepteý ádistemesin ázirleıdi. Ádisteme árbir aımaqtyń jergilikti jaǵdaıy men erekshelikterin, onyń jer resýrstaryn, klımattyq jaǵdaıyn, turǵyndarynyń quramyn, aýyl sharýashylyǵy salasynyń júrgizilý baǵytyn, topyraqtyń sapasyn jáne basqa da faktorlardy eskeretin bolady.
