Zań jobasy tabıǵat baılyǵyn qorǵaýǵa baǵyttalǵan
ASTANA. 4 qarasha. QazAqparat - Úkimetten Májiliske «Qazaqstan Respýblıkasynyń keıbir zańnamalyq aktilerine orman sharýashylyǵy, janýarlar dúnıesi jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasy kelip tústi.
Zań jobasyn qabyldaý orman sharýashylyǵyn, erekshe qorǵalatyn tabıǵı aýmaqtardy damytýǵa jáne janýarlar dúnıesin qorǵaýdy, ósimin molaıtýdy jáne paıdalanýdy jaqsartýǵa járdemdesetin bolady.
Zańsyz ań aýlaýǵa, aǵashtar men butalardy zańsyz kesýge, sırek kezdesetin jáne joıylyp ketý qaýpi tóngen janýarlar men ósimdikter túrlerimen zańsyz áreket jasaýǵa baılanysty qylmystarǵa neǵurlym tıimdi túrde qarsy turý maqsatynda Qazaqstan Respýblıkasynyń Qylmystyq kodeksine túzetýler engizý usynylady.
Qazaqstan Respýblıkasynyń Ákimshilik quqyq buzýshylyq týraly kodeksine quqyq buzý quraly bolyp tabylatyn kólik quraldaryn jáne quqyq buzýshynyń ózge zattaryn mindetti túrde tárkileý bóliginde ózgerister engizý usynylady, munyń ózi zańsyz aǵash kesý men brakonerlikke neǵurlym tıimdi qarsy turýǵa járdemdesetin bolady.
Jer zańnamasyna Qazaqstan Respýblıkasy memlekettik shekarasynyń obektilerin salý jáne kútip ustaý maqsattary úshin erekshe qorǵalatyn tabıǵı aýmaqtardy bosalqy jerlerge aýystyrý, Úkimetke orman sharýashylyǵyn júrgizýge baılanysy joq maqsattar úshin orman qory jerlerin basqa sanattaǵy jerlerge aýystyrý tártibin belgileý quzyretin berý jónindegi normalar usynylady. Shoq ormandar alyp jatqan jer ýchaskelerin kadastrǵa bólý birlikterin esepke alý jáne belgileý maqsatynda eseptik oramǵa kadastrlyq nómir berip, birdeılendirý qujatyn tapsyrýdy kózdeıtin norma usynylady.
Qazaqstan Respýblıkasynyń Orman kodeksine Ormannyń asa qaýipti zııankesteri men aýrýlarynyń tizbesin jáne olarmen kúresý tártibin bekitý jónindegi Úkimet quzyretin belgileıtin norma engiziledi.
Memlekettik orman tabıǵı rezervattarynyń jaldy ormandarynyń aýmaǵynda zańsyz aǵash kesýdi tyıý maqsatynda memlekettik orman tabıǵı rezervattaryn kúzet aımaqtarynyń aýmaǵyndaǵy shekteýli sharýashylyq qyzmet rejımin retteıtin normalardy naqtylaý usynylady.
Zań jobasynda «Janýarlar dúnıesin qorǵaý, ósimin molaıtý jáne paıdalaný týraly» jáne «Erekshe qorǵalatyn tabıǵı aýmaqtar týraly» Qazaqstan Respýblıkasynyń qoldanystaǵy zańnamalyq aktilerine ózgerister men tolyqtyrýlar engizý jolymen ańshylyq sharýashylyǵyn reformalaý jáne zańnamalyq normalardy jetildirý tájirıbesin eskere otyryp, ony ornyqty júrgizýdiń quqyqtyq jaǵdaılaryn qurý josparlanýda.
