Zań jobasy: Syrqatyna baılanysty áskerden shyǵarylǵandar baspanaly bolady

ASTANA. QazAqparat - Qyzmettik boryshyn atqarý kezinde ómiri qıylǵan áskerı qyzmetshilerdiń otbasylarynyń baspanasyzdyq máselesi sheshiletin bolady. Bul týraly Parlament Senatynyń jalpy otyrysynda QR Qorǵanys mınıstriniń orynbasary Talǵat Muhtarov málim etti, dep habarlaıdy QazAqparat.

«Zań jobasyndaǵy kelesi bir jańashyldyqqa toqtalsaq, áskerı qyzmetti ótkerý barysynda qaza tapqan áskerı qyzmetshilerdiń otbasylarynyń baspanasyzdyq máselesi sheshiledi. Atalǵan otbasylarǵa áskerı qyzmetshiniń ómiri qıylǵan óńirdegi jańa turǵyn úıdiń naryqtyq quny mólsherinde birjolǵy aqshalaı ótemaqy tóleý kózdelip otyr», - dedi T. Muhtarov.

Sonymen qatar zań jobasynda áskerı qyzmetin ótkerý kezinde jarymjan bolyp qalǵan nemese aýyr dertke shaldyǵý nátıjesinde áskerı esepten shyǵarylǵan qyzmetshilerdi baspanamen qamtamasyz etý qarastyrylýda. Bul sanattaǵy áskerılerge de qyzmetin ótegen óńirdegi jańa turǵyn úıdiń naryqtyq quny mólsherinde birjolǵy aqshalaı ótemaqy tóleý usynylady.

«Taǵy bir mańyzdy jańa normaǵa toqtalsaq, baspananyń jabyq áskerı qalashyqtar men zastavalarda ornalasýyna baılanysty, olar jekeshelendirýge jatpaıtyndyqtan, bul másele qyzmettik baspanamen qamtamasyz etilgen áskerı qyzmetshilerge qatysty bolyp otyr. Zań jobasy boıynsha olarǵa sol óńirge tıesili turǵyn úı tólemderi aı saıyn 50 paıyz kólemde aýdarylatyn bolady. Bul óz kezeginde ádiletti bolyp tabylady, sebebi memleket atalǵan áskerılerdi tegin qyzmettik baspanamen qamtamasyz etedi, olardyń kommýnaldyq tólemderin de tolyqtaı memleket kóteredi. Sondyqtan áskerı qyzmetshiniń munyń syrtynda memleket beretin 50 paıyz somasyndaǵy turǵyn úı tólemderin jınaqtap, bankterdiń ıpotekalyq nesıelendirý baǵdarlamalaryna qatysýǵa múmkindigi bar», - dedi Talǵat Muhtarov.

Aıta keteıik,  Senattyń jalpy otyrysynda «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasy eki oqylymda qaralyp, qabyldandy.