Zań jobasy: Sýdıa tárkilenetin múliktiń naqty túrin kórsetýi tıis
ASTANA. QazAqparat - Sotta múliktiń tárkileýge jatatyndyǵy mindetti túrde dáleldenýi tıis. Bul týraly Májilistegi jalpy otyrysta «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý jáne tórelik máseleleri boıynsha ózgerister men tolyqtyrýlar engizý týraly» zań jobasyn talqylaý barysynda QR Ádilet mınıstri Marat Beketaev málim etti, dep habarlaıdy QazAqparat.
Mınıstr atap ótkendeı, zań jobasy aıasynda 16 zańnamalyq aktige, onyń ishinde 8 kodekske túzetýler qarastyrylady. Jalpy alǵanda, qujat menshik ıeleriniń quqyqtaryn qorǵaýdy qamtamasyz etýge baǵyttalǵan túzetýlerdiń bes tobyn qamtıdy.
«Úshinshi top múlikti tárkileý kezinde zańdylyqty qamtamasyz etý máselesine baǵyttalǵan. Mysaly, prokýrordyń quzyretine zerdeleýge jatatyn máselelerdiń tizbesine yqtımal tárkileý úshin negiz bolatyn «múlik qylmyspen baılanysty ma nemese joq pa?» degen tujyrymdy qarastyrý usynylady. Sondaı-aq sot keńesý bólmesinde úkim shyǵarý kezinde múliktiń tárkileýge jatatyndyǵy dáleldengenin nemese dáleldenbegenin sheshetin bolady. Oǵan qosa, sottyń múlikti tárkileý túrindegi jazany taǵaıyndaý kezinde, úkimde naqty qandaı múliktiń tárkileýge jatatynyn kórsetý kózdeledi», - dep túsindirdi Beketaev.
Tórtinshi top muragerlik, notarıat, jaýapkershiligi shekteýli seriktestik qatysýshylarynyń úlesterin bólý jáne zańdy talaptardy tirkeýdiń keıbir máseleleri boıynsha túzetýleri qamtıdy.
Talqylaýlardan keıin palata depýtattary zań jobasyn birinshi oqylymda maquldady.
Birinshi topta banktiń qaryz sharttary boıynsha túzetýler eskerilgen. Mysaly, nesıe berý jáne qyzmet kórsetýmen baılanysty shottar boıynsha komıssııa alýǵa tyıym salý usynylady.
Ekinshi topta jerdi memleketke májbúrlep qaıtarýdyń tártibi naqtylandy.
Foto: bragar.org.ua
