Zań jobasy otbasy úlgisindegi balalar aýyly men jasóspirimder úılerine qatysty máseleni retteýge baǵyttalǵan
ASTANA. Qarashanyń 20-sy. QazAqparat /Aıdyn Báımen/ - Úkimetten Májiliske «Qazaqstan Respýblıkasynyń keıbir zańnamalyq aktilerine otbasy úlgisindegi balalar aýyly jáne jasóspirimder úıleri máseleleri boıynsha ózgerister men tolyqtyrýlar engizý týraly» zań jobasy kelip tústi,
dep habarlaıdy QazAqparat.
Zań jobasy jetim balalarǵa jáne ata-anasynyń qamqorlyǵynsyz qalǵan balalarǵa arnalǵan ınternattyq bilim berý uıymdarynyń tárbıelenýshilerin áleýmettik qoldaý, osy uıymdardyń túlekteriniń qatarynan jasóspirimder úılerinde áleýmettik beıimdelýden ótetin adamdardyń sheńberin keńeıtý maqsatynda ázirlendi.
«Otbasy úlgisindegi balalar aýyly jáne jasóspirimder úıleri týraly» Qazaqstan Zańy 2000 jyly otbasy úlgisindegi balalar aýylynyń jáne jasóspirimder úıleriniń quqyqtyq jaǵdaıyn aıqyndaý maqsatynda, jetim balalardyń jáne ata-anasynyń qamqorlyǵynsyz qalǵan balalardyń otbasynda ómir súrý men tárbıelený quqyqtaryn qanaǵattandyrý, sondaı-aq olarǵa adamgershilik-rýhanı tárbıe berýdi, eńbekke baýlý men bilim berýdi jan-jaqty qamtamasyz etý úshin qabyldandy.
Respýblıkamyzda otbasy úlgisindegi 6 memlekettik balalar aýyly men úsh jeke menshik SOS balalar aýyly jumys isteıdi, olarda otbasyndaǵy jaǵdaıǵa barynsha teńestirilgen jaǵdaılarda 600-ge jýyq jetim balalar jáne ata-anasynyń qamqorlyǵynsyz qalǵan balalar tárbıelenýde.
Zańdy qoldanýdyń praktıkalyq tájirıbesi kórsetkendeı, osy Zańnyń normalary jetim balalarǵa jáne ata-anasynyń qamqorlyǵynsyz qalǵan balalarǵa otbasylyq tárbıe berý, sondaı-aq olardyń áleýmettik beıimdelýden ótý nysandaryn damytýǵa járdemdesedi.
Sonymen qatar zańǵa taldaý jasaý zańdaǵy termınder men erejelerdi Qazaqstan Respýblıkasynyń qoldanystaǵy zańnamasyna sáıkes birizdendirý, silteme normalardy alyp tastaý arqyly Zań normalaryn naqtylaý qajet ekenin kórsetti.
Zań Qazaqstannyń damý basymdyqtary jáne halyqaralyq standarttar turǵysynan ózgerister men tolyqtyrýlar engizýdi qajet etedi.
Máselen, Polsha, Vengrııa sekildi shet elderdiń tájirıbesin eskere otyryp, zań jobasynda 30 jasqa tolmaǵan dep shekteý qoıýdy alyp tastaý bóliginde tárbıeleýshiler laýazymyna adamdardy irikteý kezindegi talapty ózgertý jáne rezervtegi tárbıeshilerdi áıel adamdar qatarynan ǵana emes, er adamdar qatarynan da irikteý usynylady.
Sondaı-aq jetim balalarǵa jáne ata-anasynyń qamqorlyǵynsyz qalǵan balalarǵa arnalǵan ınternattyq bilim berý uıymdarynyń janynan derbes mekeme retinde jasóspirimder úılerin ashý máselesin zańnamalyq turǵydan retteý usynylady.
Bul zań jobasy boıynsha jumys tobyn urý jáne qorytyndy ázirleý mindeti Májilistiń Áleýmettik-mádenı damý komıtetine júkteledi.
