Zań jobasy memlekettik monopolııa sýbektisiniń joǵary tarıfter belgileý jáne tutynýshylardyń zańdy quqyqtaryna qysym jasaý faktilerine jol bermeý maqsatyn kózdeıdi
TANA. 26 qyrkúıek. QazAqparat - «Qazaqstan Respýblıkasynyń keıbir zańnamalyq aktilerine memlekettik monopolııa máseleleri boıynsha ózgerister men tolyqtyrýlar engizý týraly» zań jobasy QR Úkimetiniń 2009 jylǵy 25 jeltoqsandaǵy qaýlysymen bekitilgen Qazaqstan Respýblıkasynyń 2010-2020 jyldar kezeńine
arnalǵan Quqyqtyq saıasat tujyrymdamasyn iske asyrý jónindegi is-sharalar josparyna sáıkes ázirlengen. Osy zań jobasy erteń Májiliste ótetin dóńgelek ústel barysynda talqyǵa salynady.
Qazaqstan Respýblıkasy Prezıdentiniń janyndaǵy Quqyqtyq saıasat jónindegi keńestiń 2010 jylǵy sáýirde bergen tapsyrmasyna sáıkes zań jobasynda ekonomıkaǵa memlekettik aralasýdy barynsha qysqartý jáne ulttyq qaýipsizdikti, memlekettiń qorǵanys qabiletin, qoǵamdyq tártipti, adamnyń quqyqtary men bostandyqtaryn qorǵaýdy, halyqtyń densaýlyǵyn saqtaýdy qamtamasyz etý maqsatynda memlekettiń kásipkerlik qyzmetke qatysýyn talap etetin erekshe jaǵdaılarda ǵana memlekettik monopolııany engizý kózdelgen.
Zań jobasynda Qazaqstan Respýblıkasynyń 27 zańnamalyq aktisine «Básekelestik týraly» Qazaqstan Respýblıkasy Zańynyń normalaryna sáıkes keltirýge jáne olardy ózara úılestirýge baǵyttalǵan tıisti ózgerister engizý kózdeledi.
Zań jobasy qabyldanǵan jaǵdaıda oń quqyqtyq jáne áleýmettik-ekonomıkalyq negiz qalyptasady dep kútilýde. Atap aıtqanda, memlekettik monopolııa sýbektisin qurýdyń zańnamalyq túrde belgilengen ólshemderine jaýap beretin taýardy óndirýge jáne satýǵa, satyp alýǵa nemese paıdalanýǵa memlekettiń aıryqsha quqyǵyn bekitý jolymen memlekettik monopolııaǵa jatqyzylǵan salalardy qysqartýǵa qol jetkiziledi.
Baǵa belgileýdiń ashyqtyǵyn jáne eń joǵary transparenttiligin qamtamasyz etý, sondaı-aq memlekettik monopolııa sýbektisiniń joǵary tarıfter belgileý jáne tutynýshylardyń zańdy quqyqtaryna qysym jasaý faktilerine jol bermeý maqsatynda tarıfterdi Qazaqstan Respýblıkasy Úkimetiniń deńgeıinde bekitý múmkindigi qarastyrylýda.
