Zań jobasy: Qoǵamdyq oryndarda tumshalanǵan kıim kııýge shekteý qoıylmaq
ASTANA. QazAqparat - QR Din isteri jáne azamattyq qoǵam mınıstrliginde vıtse-mınıstr Berik Arynnyń tóraǵalyǵymen «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasyn talqylaý boıynsha otyrys ótti, dep habarlaıdy QazAqparat vedomstvonyń baspasóz qyzmetine silteme jasap.
Atalǵan otyrysqa Qazaqstan Musylmandary dinı basqarmasynyń basshylyq quramy, ımamdar, «Ýaqyp» qaırymdylyq qorynyń jáne Din máseleleri jónindegi ǵylymı-zertteý jáne taldaý ortalyǵynyń ókilderi men dintanýshy ǵalymdar qatysty.
Dintaný saraptamasy basqarmasynyń basshysy Myrzaev Balǵabek zań jobasyna engiziletin jańashyldyqtarǵa toqtaldy. Onyń sózinshe, qujatta shetelde dinı bilim alý, qoǵamdyq oryndarda adamnyń bet-beınesin tumshalaıtyn kıim túrlerin kııýdi shekteý, din qyzmetine memlekettik qyzmetkerlerdiń qatysýy, din joralǵylary boıynsha nekeni qıǵyzýǵa qatysty jańa normalar qabyldanatyn bolady.
Budan bólek, zań jobasy aıasynda destrýktıvti ıdeologııalyq aǵymdardyń kıim túrlerin kııýge shekteý qoıý, BAQ-ta olardy jarnamalaýǵa jáne nanym-senimderin taratýǵa tyıym salý, dinı qyzmetke kámelettik jasqa tolmaǵandardy tartqany úshin jaýapkershilikti kúsheıtý qarastyrylady.
Otyrys barysynda qatysýshylar din máseleleri boıynsha zańnamalyq aktilerge enziletin túzetýlerdiń mańyzdylyǵyna toqtaldy. Olardyń aıtýynsha, Zań jobasy dinı ekstremızm ıdeologııalarynyń tarap ketýiniń aldyn alý boıynsha jalpy memlekettik júıeni qalyptasyrý jáne memlekettiń zaıyrly qaǵıdattaryn kúsheıtýge negiz bola alady.
Esterińizge sala keteıik, atalǵan zań jobasynyń tolyq nusqasy QR Din isteri jáne azamattyq qoǵam mınıstrliginiń resmı saıtynda jáne «Elektrondyq úkimet» portalynda jarııalanǵan.
