Zań jobasy: Qazaqstan elektr energetıkasynyń shetelge táýeldiligin tómendetý kózdelýde
NUR-SULTAN. QazAqparat – Parlament Májilisinde jańartylatyn energııa kózderin paıdalanýdy qoldaý jáne elektr energetıkasy máseleleri boıynsha zań jobasy tanystyryldy, dep habarlaıdy QazAqparat tilshisi.
Qujatty otyrysta Májilis depýtaty Shavhat Ótemisov tanystyrdy.
«Zań jobasy manevrlik qýattar salýdy yntalandyrady. Búgingi kúni elimizde elektr qýatynyń profıtsıti bar. Ol shamamen 3000 MVt quraıdy. Áıtse de qazirgi ýaqytta manevrlik qýattar tapshylyǵy baıqalady. Táýliktiń keshki ýaqytynda joǵarylaýyna jáne túngi ýaqyttarda tómendeýine baılanysty elektr energııasyn birkelki tutynbaý elektr stantsııalarynyń jedel aýyspaly jumysy tártibin talap etedi. Osyǵan baılanysty zań jobasynda generatsııanyń manevrlik rejımi bar qýattardy salý úshin tartymdy jaǵdaılar jasaý usynylady», - dedi Shavhat Ótemisov.
Onyń aıtýynsha, bul qadam óndiris-tutyný teńgerimsizdikterin retteýdi júzege asyrýǵa múmkindik beredi.
«Bul rette jobalardy irikteýdiń aýktsıondyq tetigi qoldanylatyn bolady. Osylaısha Qazaqstannyń elektr energetıkasy júıesiniń syrtqy kózderge táýeldiligi tómendeıdi. Sonymen qatar retteý boıynsha kórsetiletin qyzmet úshin búgingi tańda Reseıge ketip jatqan qarajaty elimizde qalady. Al bul - jyl saıyn shamamen 10-12 mlrd teńge», - dedi ol.
