Zań jobasy ǵylymdy basqarýdyń múldem jańa modelin usynady - B. Jumaǵulov
ASTANA. 24 qarasha. QazAqparat /Qanat Mámetqazyuly/ - «Ǵylym týraly» zań jobasy ǵylymdy basqarýdyń múldem jańa modelin usynady.
Bul týraly búgin QR Parlamenti Májilisiniń jalpy otyrysynda Bilim jáne ǵylym mınıstri Baqytjan Jumaǵulov málim etti.
Mınıstrdiń aıtýyna qaraǵanda, qujat boıynsha ǵylymdy basqarýdyń múldem jańa modeli usynylady. «Bul basty eki quramdas bólikten turady. Birinshiden, sheshim qabyldaýdyń barlyq kezeńindegi ǵalymdar róli aıryqsha kóteriledi. Jańa júıe ǵylym júıesiniń barlyq qatysýshylarynyń fýnktsııalaryn ońtaılandyrady jáne artyq bıýrokratııalyq basqarýǵa jol bermeıdi», - dedi B. Jumaǵulov.
Onyń paıymdaýynsha, zań jobasy ǵylymdy basqarý júıesindegi strategııalyq, ákimshilik jáne saraptamalyq fýnktsııalardy naqtylaýdy qarastyrady. Bul úshin joǵary ǵylymı tehnıkalyq komıssııanyń fýnktsııalary keńeıtilip, Ulttyq ǵylymı keńesterge jiti nazar aýdarylady. Olar jetekshi qazaqstandyq jáne sheteldik ǵalymdardan qurylyp, jobalar men baǵdarlamalardyń oryndalýy týraly túpkilikti sheshim qabyldaıtyn bolady. Budan bólek, memlekettik ǵylymı-tehnıkalyq saraptamanyń ulttyq ortalyǵy qurylady. Ortalyq jobalar men baǵdarlamalardy táýelsiz, kásibı baǵalaýdy qamtamasyz etedi.
Sondaı-aq, ǵylym salasyndaǵy zertteýlerdi qarjylandyrýdyń jańa júıesi men bazalyq qarjylandyrý júıesi engiziletin bolady. Granttyq qarjylandyrý sharalary da keńinen qamtylatyny kózdelgen. «Bul júıeni engizý álemdik ǵylymı keńistikke ený úderisin barynsha jyldamdatýǵa múmkindik beredi. Ǵylymdy qarjylandyrý men ǵalymdarǵa eńbekaqy tóleý máselesi de zań deńgeıinde qarastyrylyp otyr», - dedi B. Jumaǵulov.
