Zań jobasy boıynsha halyqaralyq saýdany damytý úderisinde Qazaqstannyń belsendi qatysýy úshin jaǵdaılar jasalatyn bolady
ASTANA. Qańtardyń 19-y. QazAqparat /Qanat Mámetqazyuly/ - «QR keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasy boıynsha halyqaralyq saýdany damytý úderisine Qazaqstannyń belsendi qatysýy úshin jaǵdaılar jasalatyn bolady.
Búgin QR Parlamenti Májilisinde atalǵan qujattyń tanystyrylymy barysynda Indýstrııa jáne saýda vıtse-mınıstri Tımýr Jaqsylyqov osylaı málim etti, dep habarlaıdy QazAqparat.
Vıtse-mınıstrdiń aıtýynsha, zań qabyldanǵan jaǵdaıda qosymsha baǵyttar boıynsha tarıftik kvotalardy qoldanýdyń sharttary men tetikterin, sondaı-aq tarıftik emes sharalardy qoldanýdaǵy Úkimettiń quzireti aıqyndalady. Sonymen qosa, ýákiletti organǵa saýda qyzmetin retteý salasyndaǵy qosymsha fýnktsııalar beriletin bolady.
Budan basqa, halyqaralyq saýdany damytý protsesinde Qazaqstannyń belsendi qatysýy úshin de jaǵdaılar jasaý kózdeledi. Bul syrtqy saýdadaǵy elimizdiń ónerkásip óndirisiniń ósýine, naryqtyq ortada básekelestikti qalyptastyrý jáne kóterý úshin jaǵdaı jasaýǵa múmkindik beredi.
«Sondaı-aq, saýda qyzmetin retteý salasyndaǵy zańnamany jetildirý arqyly Qazaqstan álemdik saýda júıesine yqpaldasýǵa, shıkizattyq emes sektordyń eksport úlesin ulǵaıtýǵa, ishki saýda ınfraqurylymyn damytýǵa septigin tıgizedi dep boljanady», dedi vıtse-mınıstr.
