Zań jobasy bilim berý salasynda qazirgi zamanǵy basqarý nysandaryn engizýge, ýnıversıtetti, zııatkerlik mektepterdi damytýǵa jol ashady

STANA. Qyrkúıektiń 15-i. QazAqparat - Búgin Májilistiń jalpy otyrysynda jýyrda Úkimetten kelip túsken jańa zań jobalary boıynsha qorytyndy ázirleý jónindegi másele qaraldy. Atap aıtqanda, «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» zań jobasy boıynsha qorytyndy ázirleý mindeti Áleýmettik-mádenı damý komıtetine júkteldi,

dep habarlaıdy QazAqparat.

Bul zań jobasy Qazaqstan Prezıdenti Nursultan Nazarbaevtyń bıylǵy jyly Qazaqstan halqyna jarııa etken «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Joldaýyna sáıkes ázirlengen. Joldaýda Memleket basshysy Astanada túlekterge erekshe qabyldaý sharttary men aıryqsha qoıylatyn talaptary bar bedeldi ınjenerlik-ǵylymı oqý ornyn qurý jáne tıisti zań jobasyn Parlamentke engizý mindetin alǵa qoıǵan edi.

«Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» qyzmeti úshin zańnamalyq negiz jasaý qazirgi kezde qoldanylyp júrgen «Bolashaq» halyqaralyq prezıdenttik baǵdarlamasynyń qısyndy jalǵasyna aınalady jáne Qazaqstan Respýblıkasynyń ındýstrııaldyq-ınnovatsııalyq damýynyń mindetterin sheshý úshin ulttyq ınjenerlik-tehnıkalyq jáne ǵylymı kadrlardy daıarlaýda sapaly serpilis jasalýyn qamtamasyz etedi.

Zań jobasy bilim berý salasynda qazirgi zamanǵy basqarý nysandaryn engizýge, ýnıversıtettiń, zııatkerlik mektepterdiń ınnovatsııalyq bilim berý baǵdarlamalary men ǵylymı jobalardy iske asyrý úshin qajetti akademııalyq erkindigi men derbestigin damytýǵa jol ashady. Sonymen birge bilim berý salasynda eń úzdik álemdik praktıkany eskere otyryp, jańa bilim standarttaryn engizýge jaǵdaı jasaýǵa baǵyttalǵan.