Zań jobasy: Beıbit jınalysqa qatysýshylarǵa betin búrkemeleýge tyıym salý normasy engizilmeıtin boldy
NUR-SULTAN. QazAqparat - Búgin QR Parlamenti Senaty «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» Qazaqstan Respýblıkasy Zańy jobasyna engizgen túzetýler Májiliske jiberildi, dep habarlaıdy QazAqparat tilshisi.
«Sizderge Zań jobasyn ekinshi oqylymǵa daıyndaý kezinde ony jetildirýge baılanysty týyndaǵan máselelermen tanystyrýǵa ruqsat etińizder. Bas komıtet Senattyń zańnama, redaktsııalyq-baspa bólimderimen birlese otyryp Zań jobasynyń jekelegen baptaryna ózgerister men tolyqtyrýlar engizý qajet degen toqtamǵa keldi. Komıtet Zań jobasyndaǵy alty bapqa baılanysty on alty usynysty oryndy dep sanap, olardy salystyrmaly kestege engizip, Sizderdiń nazarlaryńyzǵa usynyp otyr», - dedi Senattyń jalpy otyrysynda zań jobasy boıynsha baıandama jasaǵan senator Sársenbaı Eńsegenov.
Onyń atap ótýinshe, usynystardyń bir toby Zań jobasynyń 5-baby 2-shi tarmaǵyndaǵy beıbit jınalysty uıymdastyrýshynyń mindetteri men osy baptyń 3-shi tarmaǵyndaǵy beıbit jınalystar ótkizý kezinde tyıym salý negizderin qamtıtyn, sonymen birge 6-baptyń 3-shi tarmaǵyndaǵy beıbit jınalysqa qatysýshynyń áreketine tyıym salý týraly tarmaqtarǵa qatysty.
«Zań jobasynda uıymdastyrýshyǵa beıbit jınalystar ótkizý kezinde beıbit jınalysqa qatysýshylardan óz betin búrkemeýdi, onyń ishinde bet álpetin tanýǵa kedergi keltiretin kıim-keshekti jáne ózge de zattardy paıdalanbaýdy talap etýge mindet qylyp júktegen. Sol sııaqty, beıbit jınalysty ótkizý kezinde uıymdastyrýshyǵa bet álpetin tanýǵa kedergi keltiretin kıim-keshekti jáne ózge de zattardy paıdalanýǵa tyıym salynǵan. Komıtet uıymdastyrýshyǵa mindettelip otyrǵan bul normalardy alyp tastaýdy usynady. Sebebi keı jaǵdaıda beıbit jınalysqa qatysýshylardyń densaýlyǵyn saqtaýǵa baılanysty jeke qorǵanysh quraldaryn paıdalaný qajettiligi týyndaýy múmkin. Osyndaı negizben Zań jobasyndaǵy beıbit jınalysqa qatysýshynyń densaýlyǵyn saqtaýǵa baǵyttalǵan jeke qorǵanysh quraldaryn paıdalanýǵa múmkindik beretin tolyqtyrý usynylyp otyr», - dedi senator.
