Zań jobasy azamattyq zańnamany jetildirý máselelerin qarastyrady
ASTANA. Jeltoqsannyń 22-si. QazAqparat /Aıdyn Báımen/ - Májilistiń Zańnama jáne sot-quqyqtyq reforma komıteti «Qazaqstan Respýblıkasynyń keıbir zańnamalyq aktilerine azamattyq zańnamany jetildirý máseleleri boıynsha ózgerister men tolyqtyrýlar engizý týraly» zań jobasy boıynsha qorytyndy shyǵardy. Endi osy zań jobasy erteń Májilistiń jalpy otyrysynda birinshi oqylymda talqyǵa túsedi,
dep habarlaıdy QazAqparat.
Qazaqstan Prezıdentiniń 2007 jylǵy «Jańa álemdegi jańa Qazaqstan» atty Qazaqstan halqyna Joldaýynyń on besinshi baǵytyna sáıkes zań jobasynda usynylǵan birqatar tolyqtyrýlar jeke menshik ınstıtýtyn jáne kelisim-sharttyq qatynastardy barynsha nyǵaıtýǵa baǵyttalǵan.
Zań jobasynyń maqsaty Azamattyq kodekstiń ınstıtýttary men normalaryn jetildirý, sondaı-aq ekonomıkany damytýdyń mańyzdy sharty retinde azamattyq zańnamanyń turaqtylyǵyn saqtaý bolyp tabylady.
Bul zań jobasy boıynsha Májilistiń jalpy otyrysynda QR Ádilet mınıstriniń orynbasary Dýlat Qusdáýletov baıandama jasaıdy dep kútilýde.
