Zań jobasy: Aýyl men qala muǵalimderine qandaı áleýmettik qoldaý kórsetiledi
ASTANA. QazAqparat - Astana pedagogtarynyń jalaqysyna 25 paıyzdyq ústemeaqy qosylady. Bul týraly búgin elordadaǵy №59 mektepte ótken qoǵamdyq tyńdaý barysynda QR Bilim jáne ǵylym mınıstrligi Mektepke deıingi jáne orta bilim departamenti dırektorynyń orynbasary Sáýle Qabımoldaeva aıtty, dep habarlaıdy QazAqparat tilshisi.
"Aýyldyq jerde jumys isteıtin pedagogtarǵa jergilikti atqarýshy organdardyń sheshimimen qalalyq jaǵdaıda jumys isteıtin stavkalarymen teńdeı tarıftik stavka men jalaqysyna keminde 25 paıyzdyq ústemeaqy belgilenedi. Kommýnaldyq qyzmetterge tólem jasaý, bıýdjet qarajaty esebinen otyn satyp alý boıynsha áleýmettik qoldaý kórsetilip, jeke baspana salýǵa jer ýchaskesi bólinedi", - dedi ol.
Sonymen qatar aýyl muǵalimderiniń qorasynda maly bolsa jem-shóbine kómek kórsetilip, mal jaıylymy belgilenedi. Aýylǵa jumys isteý úshin qonys aýdaryp kelgen muǵalimge jergilikti ákimdiktiń sheshimimen kóterme járdemaqy berilip, baspana satyp alýǵa nemese salýǵa áleýmettik qoldaý kórsetiledi. Pedagogqa jergilikti bıýdjet esebinen kúntizbelik jylda bir ret saýyqtyrý járdemaqysy tólenedi jáne keminde eki laýazymdyq jalaqy tólenip, kezekti eńbek demalysy beriledi.
"Jergilikti atqarýshy organnyń sheshimimen Qazaqstan astanasynda jumys isteıtin pedagogtarǵa laýazymdy jalaqysynyń 25 paıyzynan kem emes kólemde laýazymdy jalaqyǵa koeffıtsıent belgilenedi", - dedi dırektordyń orynbasary.
