Zań jobasy arnaıy ekonomıkalyq aımaqtardy basqarý tıimdiligin arttyrýdy kózdeıdi
ASTANA. 7 maýsym. QazAqparat - Erteń, sársenbi kúni, Májilistiń jalpy otyrysynda «Qazaqstan Respýblıkasyndaǵy arnaıy ekonomıkalyq aımaqtar týraly» zań jobasy birinshi oqylymda talqyǵa salynady.
Bul zań jobasy Memleket basshysy Nursultan Nazarbaevtyń 2010 jylǵy Qazaqstan halqyna arnaǵan «Jańa onjyldyq - Jańa ekonomıkalyq órleý - Qazaqstannyń jańa múmkindikteri» attyJoldaýynda aıtylǵan ındýstrıaldyq damýdyń basymdyqtary men arnaıy ekonomıkalyq aımaqtardyń jumys isteýiniń jańa tásilderin eskere otyryp, arnaıy ekonomıkalyq aımaqtar týraly jańa zań jobasyn ázirleý qajettigi týraly tapsyrmasyn oryndaý úshin ázirlengen.
Zań jobasynyń maqsaty Qazaqstan Respýblıkasyndaǵy arnaıy ekonomıkalyq aımaqtardy basqarý tıimdiligin arttyrýdy kózdeıdi.
Sonymen qatar jalpy otyrysta «Qazaqstan Respýblıkasynyń keıbir zańnamalyq aktilerine arnaıy ekonomıkalyq aımaqtar máseleleri boıynsha ózgerister men tolyqtyrýlar engizý týraly» zań jobasyn da birinshi oqylymda qaraý týraly másele kún tártine usynylǵan.
Zań jobasynyń maqsaty jóninde QR Indýstrııa jáne jańa tehnologııalar mınıstriniń birinshi orynbasary Albert Raý baıandama jasaıdy dep kútilýde.
Zań jobasy boıynsha qurylǵan jumys tobynyń jetekshisi, Májilistiń Ekonomıkalyq reforma jáne óńirlik damý komıtetiniń múshesi Jeksenbaı Dúısebaev qosymsha baıandama jasaıdy.
