Májiliste buralqy ıtterdi atý máselesi de talqylanyp jatyr
ASTANA. KAZINFORM — Ekologııa jáne tabıǵı resrýstar mınıstrligi Orman sharýashylyǵy jáne janýarlar dúnıesi komıteti tóraǵasynyń orynbasary Andreı Kım Májiliske túsken zań jobasynda buralqy ıtterdi atý máselesi de talqylanyp jatqanyn aıtty.
«Buǵan deıin zań úısiz janýarlardyń sanyn retteýde atýǵa múldem tyıym salatyn. Qazir osy tóńirektegi zańnama ózgeristeri qandaı satyda? Qandaı baptar qalyp, qandaı baptar alynýy múmkin?» dep surady BAQ ókili.
Komıtet ókiliniń aıtýnysha, Májiliste úısiz janýarlardyń taǵdyryna qatysty birneshe usynys qaralyp jatyr.
«Túzetý talqylanyp jatyr. Qazirgi tańda Májilis túzetýler paketin qabyldap aldy. Sondaı-aq, Senat tarapynan bastamalar bar. Janýarlarǵa jaýapkershilikpen qaraý baǵytynda túrli tujyrymdamalar bar. Onyń ishinde qaıtarymsyz aýlaý boıynsha da, „aýlaý, zalalsyzdandyrý, vaktsınalaý, qaıta bosatý“ baǵdarlamasy jóninde de usynystar bar. Qazir naqty qaı usynys zańǵa engiziletinin aıta almaımyz. Zań jobasy Parlamentte jatyr», — dedi Andreı Kım.
