Zań jobasyn jasaýshylar Konstıtýtsııa talaptaryn árdaıym saqtaı bermeıdi — Ázimova
ASTANA. KAZINFORM — Konstıtýtsııalyq talaptar men qaǵıdattardy norma shyǵarý protsesiniń qatysýshylary árdaıym saqtaı bermeıdi. Bul týraly Parlament palatalarynyń birlesken otyrysynda Konstıtýtsııalyq sot tóraǵasy Elvıra Ázimova aıtty.
«Konstıtýtsııalyq sot óz sheshimderinde shekteý sharalarynyń negizderi men shegi Konstıtýtsııanyń otyz toǵyzynshy baby birinshi-tarmaǵynyń talaptaryna sáıkes kelýge tıis ekenin birneshe ret atap ótken bolatyn. Oǵan sáıkes „adamnyń jáne azamattyń quqyqtary men bostandyqtary konstıtýtsııalyq qurylysty qorǵaý, qoǵamdyq tártipti, adamnyń quqyqtary men bostandyqtaryn, halyqtyń densaýlyǵy men ımandylyǵyn saqtaý maqsatyna qajetti shamada ǵana jáne tek zańmen shektelýi múmkin“. Adamnyń quqyqtary men bostandyqtaryn kez kelgen zańnamalyq shekteý zańdy túrde negizdelgen maqsattarǵa saı bolýǵa jáne ádildik, proportsıonaldylyq jáne mólsherlestik talaptaryna saı kelýge tıis», — dedi Elvıra Ázimova.
Onyń atap ótýinshe, qylmystyq-quqyqtyq, ákimshilik-quqyqtyq jáne ózge de yqpal etý sharalary, olardyń saldarynyń sıpaty jasalǵan quqyq buzýshylyq aýyrlyǵyna sáıkes kelýge, sondaı-aq nysana turǵysynan ózara baılanysty, ártúrli salaǵa tıesili normalar ózara sáıkes bolýy tıis.
«Zańdar men ózge de normatıvtik quqyqtyq aktilerdiń mazmuny adamnyń jáne azamattyń Konstıtýtsııada bekitilgen quqyqtary men bostandyqtaryna qaraı anyqtalady. Ókinishke oraı konstıtýtsııalyq talaptar men qaǵıdattardy norma shyǵarý protsesiniń qatysýshylary árdaıym saqtaı bermeıdi», — deıdi Konstıtýtsııalyq sot tóraǵasy.
