Zań jobasy: jekemenshik balabaqsha salýǵa jer berýge tyıym salynady
ASTANA. KAZINFORM – Búgin Májilis otyrysynyń birinshi oqylymynda mektepke deıingi bilim berý, ıaǵnı balabaqsha máselesine qatysty zań jobasy qaraldy.
- Zań jobasynda mektepke deıingi bilim berýge eki mańyzdy norma qarastyrylǵan. Birinshiden, balabaqsha qurylysyna arnalǵan jer ýchaskelerin egjeı-tegjeıli josparlaýda jer bólý jáne olardy jeke menshikke berýge tyıym salý usynylady. Bul shara balabaqshalarǵa arnalǵan jerlerdi saqtap, mektepke deıingi bilim berýdiń qoljetimdiligin qamtamasyz etýge baǵyttalǵan, - dedi Májilis depýtaty Ashat Aımaǵambetov zań jobasyn tanystyra otyryp.
Sondaı-aq zań jobasynda 6 jasqa tolǵan balalardy mektepke barǵansha balabaqshada qaldyrý máselesi qaralyp otyr.
- Qazir ata-analar jıi kezdesetin máseleniń biri – balalarynyń 6 jasqa tolǵannan keıin, biraq oqý jyly bastalǵanǵa deıin balabaqshadan shyǵarylýy. Bul óz kezeginde ata-analar úshin úlken qıyndyqtar týdyrady, óıtkeni olar bala kútimin uıymdastyrý máselesimen betpe-bet keledi. Mysaly, eger bala jyldyń basynda, aqpan aıynyń 5 kúni 6 jasqa tolsa, ony keıbir balabaqshalar dereý shyǵaryp jiberedi, biraq ol balany mektepke áli bara almaıdy. Osy normany engizý arqyly balalardyń balabaqshada jazǵa deıin qalýyna múmkindik beriledi, - deıdi ol.
Aıta keteıik, búgin Qazaqstan Respýblıkasynyń keıbir zańnamalyq aktilerine mádenıet jáne bilim berý máseleleri boıynsha ózgerister men tolyqtyrýlar engizý týraly» zań jobasy Májilistiń birinshi oqylymynda qaralyp jatyr.
Atalǵan zań jobasynda jarystarda ozat bolǵan oqýshylardyń ustazdaryna bir rettik syıaqy berýdi zańdastyrý máselesi qaralyp jatyr.
Sonymen qatar zań jobasy aıasynda kitaphanalarda aqyly is-shara ótkizip, tabys tabýǵa ruqsat berilmek.