Zań jobasy: Stýdentterdi áskerge tartýdyń tártibi ózgeredi
ASTANA. KAZINFORM – Májilis zańnamaǵa áskerı-patrıottyq tárbıe máseleleri baǵytynda ózgerister engizýdi kózdeıtin zań jobasyn birinshi oqylymda maquldady. Zań jobasyn Májilistiń halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan tanystyrdy.
«2022 jyly Úkimetke azamattardy áskerı-patrıottyq tárbıeleý tártibin aıqyndaý quqyǵy berilgen bolatyn. Sol jyly-aq tıisti erejeler qabyldandy, biraq bul is-áreket qalyptasqan jaǵdaıdy ózgertpedi», - deıdi depýtat.
Osyny eskergen Parlamenttiń bir top depýtaty áskerı-patrıottyq tárbıeni jetildirýge baǵyttalǵan zań jobasyn ázirlep otyr.
Aıgúl Quspannyń aıtýynsha, zań jobasy «Áskerı qyzmet týraly» Zańyn «áskerı-patrıottyq tárbıe», «áskerı-patrıottyq tárbıe júıesi» termınderiniń mazmunyn zańnamalyq turǵydan aıqyndaıtyn jańa bappen tolyqtyrady.
Sonymen qatar osy norma respýblıkalyq jáne óńirlik deńgeılerde Áskerı-patrıottyq tárbıe jónindegi úılestirý keńesterin qurýdy kózdeıdi.
Ol keńesterge mynandaı mindetter júktelmek:
– áskerı-patrıottyq tárbıeni damytý máseleleri boıynsha usynystar ázirleý;
– áskerı-patrıottyq tárbıege múddeli memlekettik organdar men uıymdardyń, qoǵamdyq birlestikterdiń kúsh-jigeri men múmkindikterin biriktirý;
– jastardyń boıynda Qazaqstan armııasynyń jaǵymdy beınesin qalyptastyratyn kórkem jáne derekti fılmder jasaý, mýzyka jáne ádebı shyǵarmalar týdyrý, baspa ónimderin shyǵarý, telearnalarda áskerler týraly tsıkldy habarlar júrgizý jáne áleýmettik jelilerde shynshyl aqparat berý.
Sondaı-aq zań jobasynda joǵary oqý oryndarynyń janynda jumys isteıtin áskerı kafedralardyń jelisin keńeıtý usynylyp otyr. Depýtat ıÝlııa Kýchınskaıanyń aıtýynsha, eldegi stýdentterdiń 1 paıyzdan astamy ǵana áskerı kafedraǵa tartylady.
Depýtattar joǵary bilim alyp júrgen stýdentterdiń áskerı boryshyn óteý merzimin keıinge shegerý máselesin birjola retteýdi usynyp otyr. Naqty aıtsaq, bir joǵary oqý ornyn bitirip, ekinshi oqýǵa túsken stýdent áskerı boryshyn óteý merzimin keıinge shegere almaıdy. Tek aldyńǵy bilimin jetildirý úshin magıstratýra tússe, kolledjde alǵan bilimin ýnıversıtette jalǵastyratyn bolsa ǵana áskerı boryshyn óteý merzimin shegere alady.
