Zań jobalaryn daıyndaýǵa qoıylatyn talaptar qatańdatylýda - Ádilet mınıstrligi
ASTANA. Qazannyń 29-y. QazAqparat /Aıdar Ospanalıev/ -Elimizde daıyndalatyn zań jobalarynyń sapasyna degen talaptyń qatańdatylýyna baılanysty kelesi jylǵa josparlanyp otyrǵan zań jobalarynyń sany 24 paıyzǵa azaıyp otyr.
Bul týraly búgin Zańnamalyq qyzmet máseleleri jónindegi vedomstvoaralyq komıssııanyń 205-shi májilisinde Ádilet mınıstrliginiń Zańnama departamentiniń dırektory Azamat Esqaraev málim etti, dep habarlaıdy QazAqparat.
Onyń aıtýynsha, 2010 jylǵa arnalǵan zańnama qyzmeti jónindegi jospardy daıyndaý barysynda Ádilet mınıstrliginiń ókilderi aǵymdaǵy jyldyń shilde aıynyń sońynda-aq tıisti jumystardy bastap ketken. Osyǵan oraı eldegi barlyq quzyrly memlekettik organdarǵa josparǵa engizý úshin usynystar men pikirlerin joldaý jóninde suraý salyndy. «Memlekettik organdar tarapynan 40-qa
jýyq usynystar kelip tústi. Vedomstvoaralyq komıssııanyń 5 otyrysynda 24 zań jobasynyń tujyrymdasy qaralyp, atalmysh qujattar 2010 jylǵa arnalǵan josparǵa engizildi. Qujattardyń barlyǵy Ádilet mınıstrliginde aldyn ala jan-jaqty talqylanyp, zerdelendi. Olar boıynsha ǵylymı, quqyqtyq jáne zańnamalyq saraptama jumystary júrgizildi. 2010 jylǵa josparlanyp otyrǵan 24 zań jobasynyń 8-in Ádilet mınıstrligi daıyndady», dedi departament dırektory.
