«Zań jáne tártip»: Qaraǵandyda jastarǵa arnalǵan quqyqtyq kvest ótti
QARAǴANDY. KAZINFORM - Qaraǵandyda júzge jýyq jas «Zań jáne tártip aýmaǵy» atty jastar quqyqtyq kvestine qatysty.
Oǵan oblystyń qala jáne aýdandarynan kelgen on komanda qatysty.
Іs-shara «Quqyq tártibi álippesi» jobasy aıasynda uıymdastyrylyp, Memleket basshysy ádiletti qoǵam qurýdyń negizgi qaǵıdattarynyń biri retinde aıqyndaǵan «Zań jáne tártip» ıdeologııasyn ilgeriletý jumysynyń bir bóligine aınaldy.
Dástúrli dárister men dóńgelek ústelderdiń ornyna qatysýshylarǵa quqyq qorǵaý organdary men tótenshe jaǵdaılar qyzmetteriniń jumysymen tájirıbe júzinde tanysý múmkindigi usynyldy.
Quqyqtyq kvestke qatysýshylar aldynda Qaraǵandy oblysy ákiminiń orynbasary Álibek Áldeneı sóz sóıledi.
— Bıyl qazaqstandyqtar referendýmda jańa Konstıtýtsııany qabyldap, mańyzdy tańdaý jasady. Onyń basty qaǵıdattarynyń biri – «Zań jáne tártip» ıdeologııasy. Bul – qaýipsiz ári ádiletti qoǵamnyń berik negizi. Búginde jastardyń quqyqtyq saýattylyǵyn arttyrýǵa erekshe kóńil bólinip otyr. Zańdy bilý eń aldymen óz áreketteri men qabyldaǵan sheshimderi úshin jaýapkershilikti túsinýden bastalady. Dál osylaı árbir azamattyń alańsyz ómir súrip, bilim alyp, eńbek etip jáne óz múmkindikterin tolyq júzege asyra alatyn ortasy qalyptasady, — dedi Álibek Áldeneı.
Ortalyq saıabaqta ótken ashylý saltanatynda polıtsııa departamentiniń arnaıy maqsattaǵy jedel áreket etý jasaǵy men kınologııalyq qyzmetiniń kórsetilimderi uıymdastyrylyp, arnaıy tehnıka kórmesi qoıyldy.
— Bizdiń maqsatymyz – azamattardyń tynyshtyǵyn kúzetip, adamdardyń ómirin saqtap júrgen qyzmetterdiń kúndelikti eńbegin kórsetý. Bálkim, búgingi is-shara sizderdiń bolashaq mamandyq tańdaýlaryńyzǵa yqpal eter, — dedi oblys prokýrorynyń orynbasary Edil Jubanov.
Zań talaptaryn saqtaýdyń mańyzdylyǵy týraly Qaraǵandy oblysy Polıtsııa departamenti bastyǵynyń orynbasary Jasqaırat Qaıyrov ta atap ótti.
– Qazirgi jas býyn óz quqyqtaryn bilip qana qoımaı, qoǵam men memleket aldyndaǵy mindetterin de tereń túsinýi qajet. Zańdy saqtaý – azamattyq kemeldiktiń jáne quqyqtyq mádenıettiń mańyzdy kórsetkishi, – dedi ol.
Jerebe tartylǵannan keıin komandalar taqyryptyq beketter boıynsha saparǵa shyqty.
Alǵashqy aıaldama – «Quqyq tártibi aýmaǵy» beketi boldy. Munda qatysýshylar polıtsııa qyzmetiniń jumysymen jaqynnan tanysty.
B. Beısenov atyndaǵy Qaraǵandy akademııasynda jastarǵa bolashaq quqyq qorǵaý organdary qyzmetkerlerin daıarlaý úderisi kórsetildi.
Mamandandyrylǵan órt sóndirý bóliminde jáne jedel-qutqarý jasaǵynda olar qutqarý tehnıkasymen tanysyp, tótenshe jaǵdaılar kezinde áreket etý boıynsha tájirıbelik daǵdylardy meńgerdi.
Sondaı-aq taǵy bir bekette jedel járdem qyzmetiniń mamandary alǵashqy medıtsınalyq kómek kórsetý tásilderin úıretti. Ulttyq ulannyń áskerı bóliminde qoǵamdyq qaýipsizdikti qamtamasyz etý mindetteri men áskerı qyzmettiń erekshelikteri týraly aqparat berildi.
Kvest qorytyndysy boıynsha eń belsendi qatysýshylarǵa alǵys hattar men estelik syılyqtar tabystaldy. Uıymdastyrýshylardyń pikirinshe, mundaı jobalar jastardyń quqyqtyq saýattylyǵyn arttyryp qana qoımaı, zań men tártipti saqtaý jolyndaǵy jeke jaýapkershiliktiń mańyzyn tereń túsinýge yqpal etedi.
