Zań jáne tártip qaǵıdatyn iske asyrý jónindegi komıssııa quryldy
ASTANA. KAZINFORM — Memleket basshysy Úkimet janyndaǵy quqyq buzýshylyqtardyń aldyn alý jónindegi vedomstvoaralyq komıssııaǵa qatysty jarlyqqa ózgerister engizý týraly qujatqa qol qoıdy.
Engizilgen ózgeristerge sáıkes, qujattyń ataýy «Qazaqstan Respýblıkasy Úkimetiniń janyndaǵy «Zań jáne tártip» konstıtýtsııalyq qaǵıdatyn iske asyrý jónindegi vedomstvoaralyq komıssııa týraly» dep jańa redaktsııada jazyldy.
Komıssııa quqyq buzýshylyqtardyń aldyn alý jáne 2025-2030 jyldarǵa arnalǵan qoǵamda zań men tártip ıdeologııasyn ilgeriletý tujyrymdamasyn iske asyrý boıynsha memlekettik organdardyń qyzmetin úılestiretin turaqty konsýltatıvtik-keńesshi organ bolady.
Memlekettik organdardyń jumysyna taldaý júrgizip, usynymdar ázirleý úshin vedomstvoaralyq top qurylady. Onyń qyzmeti jobalyq basqarý jónindegi ýákiletti organ bekitken jobalyq basqarýdy júzege asyrý qaǵıdalaryna sáıkes aıqyndalady.
Ózgeristerge baılanysty komıssııanyń negizgi ókilettikteri bekitilgen. Atap aıtqanda, vedomstvoaralyq komıssııa memlekettik organdardyń quqyq buzýshylyqtardyń aldyn alý jáne «Zań jáne tártip» konstıtýtsııalyq qaǵıdatyn iske asyrý jónindegi qyzmetin úılestiredi.
Sonymen qatar komıssııa quqyq buzýshylyqtardyń aldyn alý sýbektileriniń jumysyn jetildirý jáne «Zań jáne tártip» konstıtýtsııalyq qaǵıdatyn iske asyrý boıynsha usynystar men usynymdar ázirleıdi.
Oǵan qosa, komıssııa quqyq buzýshylyqtardyń aldyn alý salasyndaǵy baǵdarlamalyq qujattar men tıisti tujyrymdamanyń iske asyrylý barysyn qaraıdy.
Sondaı-aq Úkimetke, oblystardyń, respýblıkalyq mańyzy bar qalalardyń jáne astananyń jergilikti atqarýshy organdaryna quqyq buzýshylyqtardyń aldyn alý jáne «Zań jáne tártip» qaǵıdatyn iske asyrý sharalaryn jetildirý jóninde usynystar engizedi.
Komıssııa quqyq buzýshylyqtardyń aldyn alý jáne «Zań jáne tártip» qaǵıdatyn iske asyrý máseleleri boıynsha aqparattyq materıaldar daıyndap, Úkimetke jáne tıisti jergilikti ókildi jáne atqarýshy organdarǵa joldaıdy.
Budan bólek, memlekettik organdardyń basshylary men laýazymdy tulǵalarynyń quqyq buzýshylyqtardyń aldyn alý jáne tıisti tujyrymdamany iske asyrý máseleleri boıynsha esepterin tyńdap, olardyń qyzmetin jetildirýge qatysty usynystar ázirleıdi.
Komıssııa vedomstvoaralyq toptyń usynymdaryn da qaraıdy.
Sondaı-aq onyń quzyretine 2025-2030 jyldarǵa arnalǵan tujyrymdamany iske asyrý týraly qorytyndy esepti daıyndap, Úkimet qaraýyna engizý jáne keıingi jyldarǵa arnalǵan «Zań jáne tártip» konstıtýtsııalyq qaǵıdatyn iske asyrý jónindegi baǵdarlamalyq qujattyń jobasyn ázirleý kiredi.
Komıssııa quramyna kimder endi
Komıssııany Qazaqstan Respýblıkasynyń Premer-mınıstri basqarady. Іshki ister mınıstri onyń orynbasary, al Іshki ister mınıstrliginiń Quqyq buzýshylyqtardyń profılaktıkalyq jumysyn úılestirý komıtetiniń tóraǵasy hatshysy bolyp belgilendi.
Komıssııa quramyna sondaı-aq Bas prokýror, Ulttyq qaýipsizdik komıtetiniń tóraǵasy, Premer-mınıstrdiń orynbasary — Ulttyq ekonomıka mınıstri, Premer-mınıstrdiń orynbasary — Jasandy ıntellekt jáne tsıfrlyq damý mınıstri, Premer-mınıstrdiń orynbasary — Mádenıet jáne aqparat mınıstri kiredi.
Sonymen birge komıssııa músheleri qataryna Qorǵanys, Syrtqy ister, Aýyl sharýashylyǵy, Ádilet, Ǵylym jáne joǵary bilim, Densaýlyq saqtaý, Eńbek jáne halyqty áleýmettik qorǵaý, Kólik, Qarjy, Oqý-aǵartý, Ónerkásip jáne qurylys, Saýda jáne ıntegratsııa, Tótenshe jaǵdaılar, Týrızm jáne sport, Energetıka mınıstrleri engizildi.
Sonymen qatar Qarjylyq monıtorıng agenttiginiń, Qarjy naryǵyn retteý jáne damytý agenttiginiń, Memlekettik qyzmet isteri agenttiginiń basshylary, sondaı-aq Prezıdent keńesshisi — Strategııalyq josparlaý jáne reformalar agenttiginiń tóraǵasy bar.
Komıssııa músheleri otyrystarǵa jeke qatysady. Prezıdentke tikeleı baǵynatyn jáne esep beretin memlekettik organdardyń birinshi basshylary otyrystarǵa jeke qatysa alady nemese komıssııa tóraǵasymen kelisý arqyly ózderiniń jetekshilik etetin orynbasarlaryn ýákilettik ete alady.
Komıssııa otyrystaryna shaqyrylǵan tulǵalar da qatysa alady.
Jarlyq 2026 jylǵy 1 qyrkúıekten bastap qoldanysqa engiziledi.
Buǵan deıin Memleket basshysy Qasym-Jomart Toqaev ǵalymdardy marapattaý rásiminde sóılegen sózinde jaýapkershilik pen tártip qaǵıdattaryn dáripteýdiń mańyzyn aıtqan edi.
