«Zań jáne tártip»: Astanadaǵy saýda oryndarynda qaýipsizdik máselesi túsindirildi
ASTANA. KAZINFORM – Astana qalasynyń Investıtsııalar jáne kásipkerlikti damytý basqarmasy, Baıqońyr aýdanynyń ákimdigi, sondaı-aq Polıtsııa departamenti men Tótenshe jaǵdaılar departamentiniń ókilderi «Alash», «Sharyn», «Ámir» jáne «Shanhaı» bazarlarynda túsindirý júrgizdi, dep habarlaıdy elorda ákimdiginiń resmı saıty.
Іs-sharanyń maqsaty – quqyq buzýshylyqtardyń aldyn alý jáne kásipkerler arasynda quqyqtyq mádenıetti arttyrý. Іs-shara barysynda sanıtarlyq normalar, órt qaýipsizdigi talaptary men jalpy zańnama normalaryn saqtaý máseleleri boıynsha túsindirý júrgizildi.
– Memleket basshysynyń tapsyrmasyna sáıkes biz qoǵamda zań men tártip ıdeologııasyn nasıhattap kelemiz. Búgin biz bul qaǵıdalardy bazarlarda jumys isteıtin kásipkerlerge túsindirip jatyrmyz. Birinshiden, zańǵa sáıkes olar órt qaýipsizdigi talaptaryn qatań saqtaýy tıis. Biz osy erejelerge nemquraıly qaraý saldarynan bolǵan iri órt oqıǵalaryn jaqsy bilemiz. Ekinshiden, qazirgi ýaqytta bazarlar jańǵyrtylyp jatyr jáne olardyń ıeleri óz jalǵa alýshylary úshin zamanaýı, qaýipsiz ári yńǵaıly saýda oryndaryn jasaý maqsatynda jańa standarttardy saqtaý mindetti. Bizdiń is-sharamyz – bul reıd nemese tekseris emes, bul – profılaktıkalyq jumys. Onyń maqsaty – adamdarǵa zańdy saqtaýdyń mańyzyn túsindirý, - dedi Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Janabaev.
Saýdagerlerge saýda núktelerin sanıtarlyq talaptarǵa saı ustaý, órt qaýipsizdigi erejelerin saqtaý, sondaı-aq qoldanystaǵy zańnama normalaryn buljytpaı oryndaý qajettigi eskertildi.
Elorda bazarlarynda qaýipsiz jáne zańǵa baǵynatyn ortany qalyptastyrý maqsatynda mundaı is-sharalar turaqty túrde ótkiziledi.
Eske sala keteıik, osyǵan deıin Qazaqstan TJ-ǵa shuǵyl den qoıý úshin biryńǵaı tsıfrlyq radıo jelisin quratynyn jazǵan bolatynbyz.