Zań jáne tártip: Astanada vandalızmge qarsy reıd bastaldy
ASTANA. KAZINFORM – Elordada vandalızm men qoǵamdyq tártipti buzýshylarǵa qarsy jappaı reıd bastaldy, dep habarlaıdy Astana qalasy ákimdiginiń resmı saıty.
Ásirese skeıtbordshylar, velosıpedshiler men BMX-raıderler jınalatyn oryndarǵa erekshe kóńil bólindi.
– Biz jurtpen sóılesip, bótenniń nemese kommýnaldyq múlikti búldirgeni, joıǵany úshin jaýapkershilik bar ekenin túsindirdik, - dedi Saryarqa aýdany ákimdiginiń ishki saıasat bóliminiń bas mamany Damır Hısmatýllın.
Sondaı-aq reıd qatysýshylary «Shapaǵat» bazary mańyndaǵy aýmaqqa baryp, turaqty mekenjaıy joq adamdardy anyqtaý sharalaryn júrgizdi.
Top quramynda shamamen 30 adam boldy. Olardyń qatarynda eriktiler, qoǵam belsendileri, blogerler men sportshylar bar.
Shaqyrylǵandar arasynda Paralımpıada chempıony Aqmaral Naýatbek, teatr jáne kıno akteri Asylhan Tólepov jáne bloger Tımýr Asylhanov boldy.
Reıdtiń negizgi maqsaty – aldyn alý jáne eskertý.
– Bul reıdter «Zań jáne tártip» aıasynda júrgizilýde. Bul – qoǵamdyq kózqarasta erekshe oryn alýy tıis qaǵıda. Zań – qoǵamda tártip ornatý úshin qajet. Biz quqyqbuzýshylyqqa «nóldik tózimdilik» qaǵıdasyn júzege asyrý úshin sharalar qabyldaýymyz kerek. Tazalyq pen qaýipsizdikti qalaıtyn ár azamat áleýmettik normalardy saqtaýy tıis, - dedi Damır Hısmatýllın.
Mundaı jaǵdaılardyń aldyn alý maqsatynda aýdan ákimdigi men quqyq qorǵaý organdarynyń qyzmetkerleri oqý oryndarynda turaqty túrde túsindirý jumysyn júrgizedi, sondaı-aq mádenı jáne sporttyq is-sharalar qatysýshylaryna quqyqbuzýshylyqqa jol berilmeıtini týraly aqparat beredi.
Erekshe nazar esirtki jarnamalaıtye graffıtı jazýlaryn boıaýǵa jáne kóshedegi tártipti saqtaýǵa aýdarylyp otyr.
Aıta keteıik, reıd Saryarqa aýdanynda ótti, Astananyń barlyq aýdanynda kúndelikti reıdter ótkiziledi. Barlyq quqyqbuzýshyǵa aıyppul nemese qamaýǵa alý túrinde shara qoldanylady.