Zań ústemdigi men tártip – qaýipsiz qoǵamnyń basty negizi – Jeńis Qasymbek

ASTANA. KAZINFORM – Kóptegen elderde damýdyń negizgi faktory zań ústemdigi men qoǵamdyq tártipti saqtaý ekeni belgili. Mundaı qoǵamda azamattar zań aldyndaǵy jeke jaýapkershiligin tereń túsinedi. Bul týraly Konstıtýtsııalyq reforma jónindegi komıssııanyń besinshi otyrysynda Astana qalasynyń ákimi Jeńis Qasymbek aıtty.

Onyń aıtýynsha, halyqaralyq ındeksterge súıensek, zań men tártipke basymdyq bergen memleketter álemdegi eń qaýipsiz elderdiń qataryna kiredi, al olardyń azamattary memlekettik ınstıtýttarǵa joǵary deńgeıde senim bildiredi.

– 2023 jyly Memleket basshysy kótergen «Taza Qazaqstan» ıdeıasy búginde el azamattarynyń ómir saltyna aınalyp keledi. Azamattardyń qorshaǵan ortaǵa jáne bolashaq urpaq aldyndaǵy jaýapkershilikti tereń sezinýi mańyzdy. Men bul qaǵıdatty negizgi postýlattardyń biri retinde tolyq qoldaımyn. «Taza Qazaqstan» – tek qorshaǵan ortaǵa ǵana qamqorlyq emes, bul oıdyń, sózdiń tazalyǵy, is-árekettegi jaýapkershilik, zańǵa jáne qoǵamdyq qundylyqtarǵa degen qurmet. Sondaı-aq kúndelikti ómirde mádenıetti saqtaý degen sóz. Osyndaı qasıetterdi boıyna sińirgen árbir azamat progressıvti, sanaly ári jaýapty qoǵam qalyptastyra alady, – dedi qala ákimi.

Aıta keteıik, Konstıtýtsııalyq reforma jónindegi komıssııa múshesi Jaqsybek Qulekeev búgingi otyrysta jańartylatyn Konstıtýtsııa mátinin áli de jetildirýdi usynyp, naqty termınderge toqtaldy.