«Zań túzeldi, dindarym, sen de túzel!» - respýblıkalyq basylymdarǵa sholý
***
Keshe elordadaǵy Kongress Holl saraıynda «El ishi - óner kenishi» respýblıkalyq televızııalyq halyq shyǵarmashylyǵy baıqaýynyń gala kontserti ótti. Keshti sóz sóılep ashqan Mádenıet jáne aqparat mınıstri Darhan Myńbaı Úkimet basshysy Serik Ahmetovtiń respýblıkalyq baıqaýǵa qatysýshy ujymdar men óner sheberlerine joldaǵan quttyqtaýyn jetkizdi. Óńirlik saıystardyń jeńimpazdaryna mınıstr halyq shyǵarmashylyǵy beınelengen belgi men arnaıy dıplomdy tabys etti. «Tamyry joq aǵash, tarıhy joq halyq bolmaıdy» desek, Elbasynyń tapsyrmasymen, Mádenıet jáne aqparat mınıstrliginiń uıymdastyrýymen qolǵa alynǵan bul jobanyń da maqsat-muraty burynǵy ata-babalarymyzdyń tunyq bastaýymen jalǵasyp jatqanyn baıqaımyz. Mádenıet oshaǵynyń ishin ulttyq órnekke toltyrǵan qolóner sheberleriniń týyndylary arqyly halyqtyq jaýharlardyń ómirsheńdigine kýá bolǵan jurtshylyq aǵashtan, temirden, kúmis pen basqa da baǵaly metaldardan áshekeılengen zergerlik buıymdardy, turmysqa qajetti zattardy, qylqalam óneri sheberleriniń kartınalaryn, kıizden jasalǵan zamanaýı kıim úlgilerin, ulttyq oıý-órnekteri kóz tartqan túskıiz, syrmaq, kilem, quraq kórpe syndy qolóner buıymdaryn tamashalap, jer-jerden jıylǵan sheberlermen dıdarlasyp jaty», dep jazady «Egemen Qazaqstan» basylymy búgingi sanyndaǵy «Altyn arqaý» atty maqalasynda.
Osy basylymda «Baýyrlastyq - eń durys baǵyt» degen taqyryppen aqparat berilgen. Keshe Qazaqstan Respýblıkasy Parlamenti Senatynyń tóraǵasy Qaırat Mámı Qyrǵyz Respýblıkasynyń Qazaqstandaǵy elshisi Esengýl Omýralıevti qabyldady. Kezdesý barysynda Qazaqstan men Qyrǵyzstannyń yntymaqtastyǵyn odan ári nyǵaıtý máseleleri talqylandy. «Bizdiń elderimiz arasyndaǵy daǵdyly baýyrlastyq qatynastar senimniń, ózara túsinistik pen tatý kórshiliktiń joǵary deńgeıimen erekshelenedi», dedi Qaırat Mámı. Ol qazaqstandyq taraptyń Qyrǵyzstannyń turaqty jáne ornyqty damýyna múddeli ekenin atap ótti.
***
«Aıqyn» basylymynyń jazýynsha, jer úshin memleketke tólenetin alymnyń naqty qanshaǵa joǵarylaǵandyǵy jaqyn ýaqytta jarııalanady. Úkimettiń keshegi otyrysynda Premer-Mınıstr Serik Ahmetov tıisti tapsyrmalardy berdi: «Ekonomıkalyq damý jáne saýda, Qarjy, Aýyl sharýashylyǵy mınıstrlikteri pysyqtap, aýyl sharýashylyǵy maqsatyndaǵy jerlerdiń jer salyǵynyń stavkalaryn arttyrý boıynsha usynys engizýi qajet». Memleket osylaısha Qazaqstandaǵy 90 mıllıon gektardan astam jerdiń tıimdi paıdalanylýyna yqpal etpek. Bul másele jóninde «Aıqyn» basylymy «Qazaq jeri qymbattady» atty maqalada jazdy.
Osy basylymnyń búgingi sanynda «Zań túzeldi, dindarym, sen de túzel!» degen taqyryppen maqala jarııalady. «Qazaqstan saıası derbestigine qol jetkizgennen keıin ózin zaıyrly memleket retinde jarııalaı otyryp, azamattyq qoǵam qalyptastyrýdyń negizin qalaı bastady. 1992 jyly qabyldanǵan «Dinı senim bostandyǵy jáne dinı birlestikter týraly» zańymyz óz kezeginde sol ýaqyttyń memlekettik-konfessıonaldyq qatynastarynyń quqyqtyq negizine aınaldy. Atalmysh Zań baqandaı 20 jylǵa jýyq ýaqyt eshqandaı ózgerissiz saltanat quryp turdy. Zaıyrly memleket bolǵanymyzben osy turǵyda memlekettik tıisti mehanızmder áldeqashan jasalýy kerek edi. Zańnyń ózgerissiz qalýynyń ózi de 20 jyldyń ishinde teris dinı aǵymdardyń keń taralyp, qoǵamda kúrdeli dinı ahýal qalyptasa bastaýyna sep bolmady deı almaımyz. Jastardyń birazy din atyn jamylǵan shalaǵaı toptardyń shyrmaýynda ketti», dep jazady gazet. Osylaısha dinı saladaǵy tyǵyryqtan shyǵý úshin memlekettiń qatal shara qoldanbasqa amaly qalmady. Osy maqsatta 2011 jyly Din isteri jónindegi agenttik qurylyp, Qazaqstan Respýblıkasynyń «Dinı qyzmet pen dinı birlestikter týraly» zańy kúshine endi. 20 jyldan keıin qabyldanǵan bul Zańnyń keıbir tustary jekelegen sarapshylardyń, dindarlardyń kóńilinen shyqpaǵanymen, tutastaı alǵanda, der kezinde qabyldanǵanyna eshkim de talasa almas. Bul týraly «Aıqyn» basylymynyń búgingi sanynda keńirek baıandalǵan.
***
«Alash aınasy» basylymynyń jazýynsha, búginde Qazaqstan Respýblıkasynyń Bas prokýratýrasynyń ózi bas bolyp el kóleminde «Kalıan» («Qorqor») operatsııasyn ótkizýge nazar aýdaryp otyr. Sebebi qazirgi kúnde temekiden góri, osy ýly zatty paıdalanatyndar qatary kóbeıip barady. Ashyq túrde saýdalanyp jatpaǵanymen, kóbine kóńil kóterý oryndarynda qorqor tartyp, kók tútindi býdaqtatyp otyratyndardyń deni jastar ekendigi alańdatpaı qoımaıdy. Onyń ústine qorqordyń tanymaldyǵy da, oǵan degen suranys ta artyp, burynǵymen salystyrǵanda taralý aıasy da keńeıe túsken. Qorqorǵa qatysty mamandar zertteýine zer salsańyz, ón boıyńyzdaǵy qorqynysh qoıýlaı túsedi: onyń ýlylyǵy temeki tútininen birneshe ese joǵary.
