Zań termınderine qatysty birizdilikti saqtaý úshin jańa sózdik shyǵarylady

Bul jaıly búgin QR Ádilet mınıstrliginde «Memlekettik tildegi zań termınderin birizdendirý máseleleri» atty taqyrypta dóńgelek ústel jıyny barysynda belgili boldy.

«Búgingi kúni zań termınderine qatysty 20-dan astam sózdik qoldanysta bar. Alaıda bulardyń qaısysyn zań jobalaryn ázirleý barysynda qoldanýdyń durystyǵyn, olardyń qaıda maquldanǵanyn aıta almaımyz. Óıtkeni, bul sózdikterde birizdilik joq, termınderdiń aýdarmasy ár sózdikte ártúrli bolyp keledi. Túpnusqalyq ta saqtalmaı jatady. Osyndaı máseleniń ózi kóp jaıtty ańǵartsa kerek. Budan bólek, zań termınderine qatysty standarttar da joq. Osy másele qazaq tilinde zań jobasyn ázirleýge úlken kedergi keltirip otyr», - dedi Ádilet vıtse-mınıstri Dýlat Qusdáýletov.

Sonymen birge, Ádilet vıtse-mınıstri memlekettik tildegi zań jobalaryn ázirleý úshin zań termınderine qatysty ortaq mátinder saralanýy tıistigin atap ótti. «Sondyqtan da biz qoldanystaǵy 20-dan astam zań termınderi sózdikterine saraptama jasap, birizdi qoldanylatyn zań termınderiniń sózdigin qalyptastyrýymyz kerek. Aldaǵy ýaqytta árbir memlekettik organ zań jobalaryn ázirlegende osy jańadan qalyptasatyn sózdikti basshylyqqa alsa quba-qup bolatyn edi», - dedi ol.