Zań shyǵarý úderisin barynsha ashyq jáne ınklıýzıvti túrde júrgizýimiz kerek - Máýlen Áshimbaev

ASTANA. QazAqparat - Senat spıkeri Máýlen Áshimbaevtyń tóraǵalyǵymen palata bıýrosynyń otyrysy ótti. Otyrys barysynda depýtattar Senattyń jobalaý keńsesi týraly erejeni bekitip, onyń quramyn anyqtady, dep habarlaıdy QazAqparat.

Senat tóraǵasy óz sózinde VIII saılanǵan Parlamenttiń birinshi sessııasynyń ashylýynda Memleket basshysy Parlament pen Úkimetke naqty mindetter júktegenin atap ótti.

Sondaı-aq Prezıdent tapsyrmalaryna sáıkes palata jumysyndaǵy basym baǵyttarǵa toqtaldy.

Ashyqtyq, ınklıýzıv jáne zań jobalaryn jan-jaqty talqylaý arqyly zań shyǵarý qyzmetiniń sapasyn arttyrý máselesine basa mán berildi.

Soǵan baılanysty bıýro músheleri Senattyń jobalyq keńsesi týraly erejeni bekitti.

Sondaı-aq senatorlar men palata apparatynyń qyzmetkerlerinen quralǵan keńseniń turaqty quramy anyqtaldy.

Senat spıkeri atap ótkendeı, jobalyq keńse – Memleket basshysy belgilep bergen mindetterdi sapaly ári ýaqtyly júzege asyrýǵa arnalǵan mańyzdy tetik.

«Biz Ádiletti Qazaqstan qurýǵa jáne memlekettik saıasatty júıeli reformalaýǵa arnalǵan zańdar qabyldaımyz. Sondyqtan zań shyǵarý úderisi, zań jobalaryn ázirleý jáne talqylaý barynsha ashyq ári ınklıýzıvti túrde júrgizilýi kerek. Memleket basshysy belgilep bergen mindetterdi sapaly ári ýaqtyly júzege asyrý úshin Májilispen, Úkimetpen jáne basqa da múddeli taraptarmen birlesip jumys isteımiz. Bárimiz birlesip, elimizdiń jańa kezeńdegi damýyna qajetti zańdar qabyldaımyz dep senemin», – dedi Máýlen Áshimbaev.

Jobalaý keńsesi – Senat janyndaǵy konsýltatıvtik-keńesshi organ. Onyń qyzmeti jobaǵa baǵyttalǵan basqarý júıesin qurýǵa jáne úılestirýge arnalǵan.

Jobalyq keńseniń jumysyna bıznes, saraptamalyq qoǵamdastyq jáne azamattyq qoǵam ókilderi de qatysa alady.

Keńseniń negizgi mindeti – baǵdarlamalar men jobalarǵa bastamashylyq jasaý, onyń ishinde zań shyǵarý protsesin tsıfrlandyrý jáne ashyqtyq qaǵıdaty arqyly jobalyq basqarýdy qamtamasyz etý.