Zań shyǵarý protsesi únemi jetildirýdi talap etedi - Bektas Beknazarov
NUR-SULTAN. QazAqparat – Búgin QR Parlamenti Senatynda Zań shyǵarý protsesin jetildirý jónindegi keńestiń alǵashqy otyrysy ótti, dep habarlaıdy QazAqparat tilshisi.
«Keıbir zań jobalaryn daıarlaý sapasy tıisti deńgeıde emes. Osyǵan baılanysty bul baǵyttaǵy jumystarda Ádilet mınıstrliginiń kúsh-jigeri mańyzdy. Vedomstvoda qyzmet etetin bilikti mamandar zań jobalaryn daıarlaý deńgeıinde belsendi atsalysýy kerek», - dedi Senat tóraǵasynyń orynbasary Bektas Beknazarov.
Osy oraıda ol zań shyǵarý protsesi únemi jetildirýdi talap etetinin atap ótti.
«Ol úshin Úkimettiń zań jobalaý qyzmetin josparlaýdy jetildirý, zań jobalary men olardyń tujyrymdamalaryna ǵylymı saraptama uıymdastyrý ádisterin túbegeıli ózgertý, qazaq jáne orys tilderinde birdeı túpnusqany qamtamasyz etý boıynsha tıimdi sharalar qabyldaý, memlekettik organdardaǵy zań jobalaryn ázirleýge jaýap beretin naqty adamdarynyń jaýapkershiligin kúsheıtý qajet», - dep atap ótti Senat Tóraǵasynyń orynbasary.
Óz kezeginde Ádilet mınıstriniń mindetin atqarýshy Natalıa Pan «Zań shyǵarý protsesin odan ári jetildirý» taqyrybyndaǵy parlamenttik tyńdaýdyń qorytyndysy týraly aıtty. Ol qabyldanatyn jáne qabyldanǵan zańdardyń turaqtylyǵy men sapasyn qamtamasyz etý úshin Ádilet mınıstrligi jekelegen memlekettik organdarǵa da, jalpy zań shyǵarý júıesine de yqpal etýdiń barlyq yqtımal tetikterin qoldanyp kele jatqanyn aıtty.
Bul taqyryp boıynsha senator Vladımır Volkov parlamenttik tyńdaýdyń qorytyndysy boıynsha 17 pýnktten turatyn usynystar daıyndalǵanyn habarlady. Ádilet mınıstrligi tarmaqtardyń bir bóligin oryndady. Qalǵandary uıymdastyrý turǵysynda jáne keshendi sheshimdi talap etedi. Ol «Qazaqstan Respýblıkasynyń keıbir zańnamalyq aktilerine norma shyǵarýdy jetildirý máseleleri boıynsha ózgerister men tolyqtyrýlar engizý týraly» zań qabyldanǵannan keıin múmkin bolady.
Aıta keteıik, Parlament Senaty janyndaǵy Zań shyǵarý protsesin jetildirý jónindegi keńes bıylǵy jyldyń 1 shildesinde zań shyǵarý qyzmetiniń tıimdiligin arttyrý maqsatynda qurylǵan bolatyn. Onyń quramyna Senat depýtattary, memlekettik organdar men qoǵamdyq birlestikterdiń ókilderi, belgili quqyqtanýshy ǵalymdar kirdi.
