Zań shyǵarý isindegi azamattardyń belsendiligi qandaı – sarapshy pikiri
Talqylaýǵa «Rýhanı jańǵyrý» qazaqstandyq qoǵamdyq damý ınstıtýtynyń basqarma tóraǵasy Kemelbek Oıshybaev, «KazıÝrKonsaltıng» JShS seriktesi Erlan Býzýrbaev, Aqparat jáne qoǵamdyq damý mınıstrligi men Eńbek jáne halyqty áleýmettik qorǵaý mınıstrlikteriniń ókilderi, sarapshylar qatysty.
Onlaın rejımdegi otyrys barysynda Erlan Býzýrbaev halyqty áleýmettik qorǵaý salasyndaǵy zańnama máselelerine júrgizgen zertteý qorytyndysymen bólisti.
«Memlekettiń jaýapkershiliginiń negizgi ári aýqymdy bóligi – qoǵamǵa, qoldaý men kómekke muqtaj sanattaǵy azamattarǵa qatysty áleýmettik saıasatty júrgizý. Álbette zańnamanyń belgili bir dárejede shekteýshi sıpaty bar. Al adamnyń basty mindeti – memlekettik apparat qyzmetin jalǵastyrýy úshin salyqty ýaqtyly tóleý. Memlekettik retteý men qazirgi zańnama júıesi – azamattardyń quqyǵy men erkindigin aıqyndaıtyn Konstıtýtsııaǵa negizdeledi», - dedi Erlan Býzýrbaev.
Sarapshynyń aıtýynsha memlekettiń mindettemelik aýqymy óte úlken.
«Memleket áleýmettik salada óte aýqymdy mindettemege ıe. Memlekettik saıasattyń bir bóligine halyqty áleýmettik turǵyda qoldaý, kómek kórsetý jumysy enedi», - dedi ol.
Sonymen birge Erlan Býzýrbaev qazirgi tańda elimizde zańnamalyq úrdiske qatysty belgili bir problemanyń baryn ashyp aıtty. Sarapshynyń esepteýinshe, azamattar zań shyǵarý protsesine aıtarlyqtaı tartylmaǵan.
«Jobalardy talqylaýǵa arnalǵan «Ashyq NQA» portaly https://legalacts.egov.kz/ azamattardyń zań shyǵarý isine sırek aralasatynyn kórsetedi. Meniń oıymsha, olardyń bul selqostyǵynyń sebebin ártúrli jaǵdaıǵa, quraldardy jetildirý, halyqtyń óz quqyǵynan habarsyz bolýyna baılanysty túsindirýge bolady. Áıtse de meniń oıymsha, mundaı dıalog alańdarynda belsendilik tanytpaýdyń sebebi – azamattardyń memlekettik bastamalardyń kóbine seniminiń bolmaýynan der edim», - dep esepteıdi sarapshy.