Zań shyǵarý ınstıtýty janynan Lıngvıstıkalyq ortalyq qurylady
ASTANA. 22 sáýir. QazAqparat /Qanat Mámetqazyuly/ - Búgin Ádilet mınıstrliginde «Memlekettik tildegi zań termınderin birizdendirý máseleleri» atty taqyrypta dóńgelek ústel jıyny bolyp ótti.
Dóńgelek ústel barysynda zań jobalarynyń túpnusqalyǵy mánine ǵylymı lıngvıstıkalyq saraptama júrgizý máseleleri jaıynda áńgime órbidi. «Búgingi kúni zań jobalaryn ázirleý barysynda qazaq jáne orys tilderindegi mátinderge qatysty qoǵam tarapynan, depýtattar men ǵalymdar tarapynan da birqatar synı pikirler qalyptasyp otyrǵany belgili. Sondyqtan da, osydan biraz buryn normatıvtik quqyqtyq aktiler jónindegi qoldanystaǵy zańnamaǵa ózgerister engizip, zań jobalaryna lıngvıstıkalyq saraptama jasaýdyń mindetti túrde júrgizilýi qajettigin kórsetken bolatynbyz. Ondaı saraptamaǵa qatysty quzyret Úkimetke berilgen edi. Sondyqtan da, Úkimet zań jobalaryna saraptama jasaıtyn organ retinde zań shyǵarý ınstıtýynyń ishinen lıngvıstıkalyq ortalyq qurýdy qolǵa alatyn bolady. Bul jónindegi qaýly boıynsha 20-ǵa tarta maman úshin shtat qarastyrylyp, arnaıy bıýdjettik qarajat bólinedi», - dedi jıyn barysynda sóz sóılegen Ádilet vıtse-mınıstri Dýlat Qusdáýletov. Atalǵan ortalyq memlekettik organdar tarapynan ázirlegen zań jobalaryn mindetti túrde lıngvıstıkalyq saraptamadan ótkizýmen aınalyspaq.
Basqosýda memlekettik organ ókilderinen qurylǵan jumys toby memlekettik tildegi zań termınderiniń biryńǵaı qoldanylý qajettiligin atap ótip, bunyń normatıvtik quqyqtyq aktiler mátinderindegi sáıkessizdik máselelerin sheshetinine nazar aýdartty. Jıyn qorytyndysyna oraı, dóńgelek ústelge qatysýshylar birqatar usynymdar qabyldady.
