Zań shyǵarý úderisinde qazaq tilindegi drafting ortalyqtaryn qurý kerek — senator

ASTANA. KAZINFORM — Zań shyǵarý úderisinde qazaq tilindegi drafting ortalyqtaryn qurý kerek. Bul týraly Parlamentarızm ınstıtýty uıymdastyrǵan dóńgelek ústel barysynda Senat depýtaty Bıbigúl Jeksenbaı aıtty.

— Jalpy halyqaralyq tájirıbe kórsetkendeı, kez kelgen memlekette til saıasatynyń tabysty damýy zańnamalyq mehanızmderge tikeleı baılanysty. Kanadada 1988 jylǵy Official Languages Act zańy boıynsha barlyq zań mátinderi bastapqydan eki tilde ázirlenedi jáne eki nusqanyń da birdeı zańdyq kúshi bar. Ýels avtonomııasynda 2012 jyly qabyldanǵan Welsh Language Measure Act aktisi vallıı tilin resmı mártebege kóterip, zań shyǵarý protsesin eki tilde júrgizýdi mindettedi. Latvııada memlekettik til — tek latysh tili. Barlyq zań mátinderi tek latysh tilinde ázirlenedi. Bul — ulttyq biregeılikti saqtaýdyń negizgi qaǵıdaty, — dedi Senat depýtaty.

Onyń atap ótýinshe, osy tájirıbeler Qazaqstan úshin mańyzdy.

— Bizdiń elimiz Kanada men Ýels úlgisindegi qostildi quqyqtyq modelge ıe, alaıda basty aıyrmashylyq — bastapqy drafting (jazý — red.) tili. Kanadada ol eki tilde qatar, al Qazaqstanda kóbine orys tilinde júredi. Sondyqtan zań shyǵarý úderisinde qazaq tilindegi drafting ortalyqtaryn qurý, sondaı-aq zańgerler men lıngvısterdiń birikken saraptama júıesin engizý — ýaqyt talaby, — dedi Bıbigúl Jeksenbaı.

Sonymen qatar senator zań jobalarynyń alǵashqy drafting tilin — memlekettik til retinde bekitý qajettigin atap ótti.

Otyrysta Parlamentarızm ınstıtýty dırektorynyń orynbasary Lázzat Súleımenova memlekettik tildiń basymdyǵy zań júzinde bekitilgenimen tájirıbede qoldanylý deńgeıi áli de jetkiliksiz ekenin aıtqan edi.