Zań men tártip tek memlekettiń ǵana emes, azamattyń da jaýapkershiligi – Nurǵazy Anýarbekov
ASTANA. KAZINFORM – Zań men tártipti nyǵaıtý úshin tek zańdardy jetildirý jetkiliksiz. Bul úderiske ár azamat óz jaýapkershiligin sezinip, úles qosýy kerek. Bul týraly Jibek Joly telearnasynda tikeleı efırde ótken «Ashyq stýdııa» saıası tok-shoýynda zańger, konstıtýtsııalyq quqyq jáne memlekettik basqarý salasyndaǵy sarapshy Nurǵazy Anýarbekov aıtty.
Quryltaı saılaýyna qatysatyn jeti saıası partııa ókilderiniń qatysýymen ótken teledebatty tamashalaǵan zańger partııalardyń birqatar usynysyna qatysty pikir bildirdi.
- Zań men tártipti qalyptastyrýda, quqyq ústemdigin nyǵaıtýda tek memlekettiń ǵana emes, azamattardyń jeke jaýapkershiligi de mańyzdy. Óıtkeni zań men tártipti nemese zańnamalyq normalardy qur bekitip qoıý arqyly biz qalaǵan qaǵıdattardy iske asyra almaımyz. Biz memlekettik organdar, memlekettik ınstıtýttar jáne azamattar bolyp, árqaısymyz óz jaýapkershiligimizdi sezinip, qoǵam aldyndaǵy boryshymyzdy túsinip áreket etkende ǵana, oǵan qol jetkize alamyz.
Partııalardyń basym bóligi bul týraly aıtty. Memlekettik ınstıtýttardy nyǵaıtýǵa, ásirese sot reformasyn jasaýǵa qatysty máseleler kóterildi. Biraq bul jerde erekshe atap ótetin jaıt - azamattardyń jeke jaýapkershiligi. Árqaısymyzdyń memleketti nyǵaıtýǵa baǵyttalǵan áreketimiz qandaı bolýy kerek ekenin naqty bilýimiz qajet. Zań men tártip degenimiz - osy. Eki jaqty áreket bolýy kerek, sonda ǵana biz bir nátıjege qol jetkizemiz, - dedi sarapshy.
Nurǵazy Anýarbekov «Zań men tártip» qaǵıdatynyń Konstıtýtsııada bekitilgenin de atap ótti.
Onyń aıtýynsha, saıası partııalar saılaýaldy ýádelerin oryndaý úshin zań jobalaryn ázirlegen kezde, olardyń Ata zańdaǵy negizgi qaǵıdattarǵa sáıkes kelýine mán berýi kerek.
- «Zań men tártip» bizdiń Konstıtýtsııamyzda bekitilgen. Negizgi ıdeıa, kontseptsııa bar. Ol boıynsha naqty baǵyttar aıqyndaldy. Partııalar bergen ýádesine sáıkes zań men tártipti qamtamasyz etý úshin zańdar qabyldaı bastaıdy. Osy ýádelerdi oryndaý úshin belgili bir zań jobalary ázirlenedi. Sáıkesinshe, zańdar Konstıtýtsııada baıandalǵan qaǵıdattarǵa sáıkes kelýi kerek. Konstıtýtsııanyń úshinshi babynda memlekettiń negizgi qaǵıdattary aıqyndalǵan.
Sol qaǵıdattarǵa negizdelgen zań jobalary iske asyrylyp, zań men tártipti nyq tuǵyrǵa qondyrý arqyly quqyqtyq memleket qura alamyz, – dep sózin túıindedi Nurǵazy Anýarbekov.
Buǵan deıin Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń (QSZI) Saıası zertteýler bóliminiń jetekshi sarapshysy Nurdáýlet Zatılla Jibek Joly telearnasynda Quryltaı saılaýyna qatysatyn jeti saıası partııa ókilderiniń qatysýymen bolǵan teledebattan keıin óz oıyn bildirgen edi.
