«Zań men Tártip» servısi: Quqyq buzýshy ústinen kim shaǵym jasaǵanyn bile ala ma
ASTANA. KAZINFORM – «Zań men Tártip» tsıfrlyq servısine quqyq buzýshylyq týraly 14 myńnan astam habarlama tústi. Bul týraly BIZDIÑ ORTA podkastynda ІІM Aqparattyq saıasat departamentiniń basqarma bastyǵy Shuǵyla Turlybek aıtty.
Onyń dereginshe, «Zań men Tártip» tsıfrlyq servısi arqyly jol júrisi erejesin buzý, quqyq buzý, jol-kólik oqıǵasy, úıdegi zorlyq-zombylyq, balaǵa qatysty oqıǵa boıynsha foto jáne vıdeo málimetterdi birden jiberýge bolady. Sondaı-aq polıtsııa qyzmetkerleriniń áreketine aryzdanýǵa da múmkindik bar.
– Servıs qosylǵannan beri quqyq buzýshylyq týraly 14 myńnan astam derek tústi. Olardyń basym bóligi jol erejelerin buzý, jol-kólik apattary jáne qoǵamdyq jerdi lastaý faktilerine qatysty, - dedi Shuǵyla Turlybek.
Májilis depýtaty Natalıa Dementeva atalǵan tsıfrlyq servıske baılanysty sheteldik tájirıbelerdi qarap shyqqanyn aıtady.
– Eýropa elderiniń bárinde osyndaı servıs bar. Germanııa, Shveıtsarııa, Frantsııa elderiniń tájirıbesin qaradym. Birneshe elde sátti júzege asyrylyp jatyr. Osy oraıda sol eldiń azamattarynyń mentalıtetine nazar aýdarǵanymyz jón. Máselen, olardyń mentalıtetinde domalaq aryz degen uǵym múlde joq. Olarda bir-birine arandatýshylyq nemese jala jabý bolmaıdy. Óıtkeni, olardyń bári zańǵa baǵynady. Olardyń sanasynda burynnan beri qalyptasqan túsinik bar, - dedi ol.
Osy oraıda Májilis depýtaty Іshki ister mınıstrligi ókilinen quqyq buzýshynyń ózine shaǵymdanǵan adamnyń aty-jónin bilý múmkindigi bar ne joǵyn surady.
– Úshinshi tarapqa berilmeıdi. Quqyq buzýshy ústinen kim shaǵym jasaǵanyn surasa da ala almaıdy. Júıeden de kimniń shaǵym bergenin kórýge múmkindik joq. Shaǵym berýshiniń aty-jónin, málimetterin tek polıtsııa ǵana kóre alady, - dedi Shuǵyla Turlybek.
Esterińizge sala ketsek, bıyl maýsymda Іshki ister mınıstrligi «Zań men tártip» jańa tsıfrlyq servısin iske qosty.