«Zań men Tártip» el ómiriniń ajyramas bóligi, buljymas qaǵıdaty bolýǵa tıis – Prezıdent
ASTANA. KAZINFORM – Órkenıetti qoǵamda dóreki sóıleýge, bireýdiń ar-ojdanyna nuqsan keltirýge, ózgelerdi kemsitýge jol berilmeıdi jáne ondaı áreket zań boıynsha jazalanady. Prezıdent Qasym-Jomart Toqaev zań men tártip ústemdigin arttyrýdy tapsyrdy.
– Biz ádiletti qoǵam bolamyz desek, ár iske jaýapkershilikpen qarap, bir-birimizge janashyr bolýymyz qajet. «Taza Qazaqstan» ıdeıasyna saı tabıǵatqa qamqor kózben qarap, bolmysymyzdy, nıetimizdi jáne tilimizdi taza ustaý mańyzdy, – dedi Memleket basshysy «Qazaq tili» qoǵamynyń H quryltaıynda.
Prezıdenttiń aıtýynsha, órkenıetti qoǵamda dóreki sóıleýge, bireýdiń ar-ojdanyna nuqsan keltirýge, ózgelerdi kemsitýge, qoqysty kóshege nemese qoǵamdyq jerlerge laqtyrýǵa, kez kelgen jerge túkirýge, qoǵamdyq dúnıeni buzyp, syndyrýǵa jol berilmeıdi jáne ondaı áreket zań boıynsha jazalanady.
– Bul – barlyq quqyq qorǵaý mekemelerine qatysty jeke jáne óte mańyzdy tapsyrmam. Otanymyzdy jańa órkenıetti deńgeıge kóterýimiz kerek. Osy ózekti jumysta qazaq tiliniń memlekettik til retinde mártebesin kóterý, kúsheıtý, dáripteý tarıhı mindet ıa mıssııa desek, artyq bolmas. «Zań men Tártip» el ómiriniń ajyramas bóligi, buljymas qaǵıdaty bolýǵa tıis. Óıtkeni zań men tártip ústemdigi – memlekettiligimizdi nyǵaıtýdyń, Egemendigimizdi qorǵaýdyń birden-bir sharty, – dedi Qasym-Jomart Toqaev.
Ókinishke qaraı, keıbir teris pıǵyldy adamdar «Zań men tártip» qaǵıdatyn burmalap, ony qysym jasaýdyń quraly retinde kórsetkisi keledi.
– Ashyǵyn aıtsaq, bul – aramdyq. Mundaı keleńsiz áreketke qatań tosqaýyl qoıýymyz kerek. Halqymyzda «Ádep basy – til» degen ataly sóz bar. Sondyqtan osy memlekettik mańyzy bar jumysqa «Qazaq tili» qoǵamynyń ókilderi, jalpy, tilimizdi únemi qoldaıtyn azamattar belsene atsalysýy kerek, – dedi Prezıdent.
Aıta keteıik, Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaıynda sóz sóıledi.
Buǵan deıin Prezıdent Táýelsiz Qazaqstan tarıhynda mundaı aýqymdy joba bolmaǵanyn, otandyq kásipkerlerge mol múmkindikter beriletinin aıtqan edi.