Zań men qoǵamdyq tártip qatań saqtalmasa, eshqandaı reforma oıdaǵydaı júzege aspaıdy – Prezıdent
TÚRKІSTAN. KAZINFORM – Memleket basshysy Qasym-Jomart Toqaev eldegi zań men tártiptiń mańyzy týraly aıtty.
– Men nelikten Zań men tártip qaǵıdatyn mindetti túrde iske asyrý týraly jıi aıtamyn? Sebebi zańdar men qoǵamdyq tártip qatań saqtalmasa, elimizde eshqandaı reforma oıdaǵydaı júzege aspaıdy. Óıtkeni bul – ómirdiń saıası zańy.
El ishin turaqsyzdyq jaılaǵan, bılik ınstıtýttary orynsyz, jónsiz syn men shabýylǵa ushyraǵan memleketterde eshqandaı ilgerileý bolmaıdy.
Osy oraıda, men bizdiń elimizdegi qoǵamdyq ómir durys tabıǵı jolmen, ıaǵnı, evolıýtsııalyq jolmen damý kerektigin, toqyraýǵa múlde jol berýge bolmaıtynyn jaqsy túsinemin.
Sol sebepti 2022 jyldyń ózinde Konstıtýtsııaǵa Prezıdentti jeti jyldyq merzimmen bir ret qana saılaý týraly ereje engizildi. Prezıdenttiń jaqyn týystaryna memlekettik qyzmette, sondaı-aq ulttyq kompanııalarda laýazymdy qyzmet atqarýǵa tyıym salyndy.
Al jańa Ata Zańǵa konstıtýtsııalyq jáne quqyq qorǵaý organdarynyń basshylaryn bir merzimge saılaý týraly ereje engizildi. Biz biletin elderdiń konstıtýtsııasynda dál osyndaı erejeler joq dep aıtýǵa bolady, - dedi Memleket basshysy.
Eske salsaq, buǵan deıin Memleket basshysy el qoldaýyna ıe bolǵan naǵyz Halyq Konstıtýtsııasy tuǵyryna qonǵanyn alǵa tartty.
