Zań maquldandy: Qazaqstan-Ózbekstan shekarasy rejımin retteýdiń biryńǵaı tetigi bekitildi
ASTANA. KAZINFORM – Búgin Senattyń jalpy otyrysynda «Qazaqstan Úkimeti men Ózbekstan Úkimeti arasyndaǵy Qazaqstan – Ózbekstan memlekettik shekarasynyń rejımi týraly kelisimdi ratıfıkatsııalaý týraly» Zań maquldandy.
Kelisimge 2024 jylǵy 8 tamyzda Astana qalasynda Ózbekstan Respýblıkasy Prezıdentiniń memleketimizge resmı sapary aıasynda eki memlekettiń syrtqy ister mınıstrleri qol qoıdy.
- Qujat Qazaqstan men Ózbekstan Respýblıkalary arasyndaǵy 2001 jylǵy 16 qarashadaǵy memlekettik shekara týraly sharttyń erejelerin iske asyrý aıasynda 2022 jylǵy 22 jeltoqsanda Qazaqstan - Ózbekstan memlekettik shekarasyn demarkatsııalaý protsesi aıaqtalyp, demarkatsııa týraly shartqa qol qoıylǵannan keıin ázirlendi. Sonymen birge, jergilikti jerlerde memlekettik shekara syzyǵyn naqty belgileý aıaqtalyp, eki memleket arasyndaǵy shekaradaǵy qatynastardy retteýdiń qajetti halyqaralyq-quqyqtyq negizi qalyptasty. Atap aıtsaq, memlekettik shekara rejımi - memlekettik shekarany jáne shekara belgilerin kútip-ustaý, adamdardy, kólik quraldaryn, júkterdi ári ózge de múlikti shekara arqyly ótkizý, shekaralyq beldeýler men sýlarda sharýashylyq jumystardy júrgizý tártibin, shekaralyq oqıǵalardy retteý tetikterin qamtıtyn quqyqtyq jáne uıymdastyrýshylyq sharalar kesheni, - dedi senator Ǵalıasqar Sarybaev.
Atap aıtqanda, shekara mańyndaǵy ózara is-qımyldyń jekelegen máseleleri ulttyq zańnamamen jáne birqatar ekijaqty kelisimmen rettelip keldi. Usynylyp otyrǵan Kelisim Qazaqstan-Ózbekstan memlekettik shekarasy rejımin retteýdiń biryńǵaı keshendi halyqaralyq-quqyqtyq tetigin qalyptastyrady.
- Osydaı Kelisim Qazaqstan - Qytaı Halyq Respýblıkasymen, Qyrǵyz elimen, Túrikmenstan memleketimen jasalǵan. Qazaqstan - Reseı memlekettik shekarasyn demarkatsııalaý tolyq aıaqtalǵannan keıin, Reseı Federatsııasymen uqsas kelisim jasaý jumystary júrgiziletin bolady. Al, Ózbekstan Respýblıkasy ishki memlekettik rásimderdi aıaqtap, Kelisimdi 2025 jylǵy 26 qańtarda ratıfıkatsııalady. Kelisimdi ratıfıkatsııalaý teris áleýmettik-ekonomıkalyq jáne quqyqtyq saldarǵa alyp kelmeıdi, respýblıkalyq jáne jergilikti bıýdjetterden qosymsha shyǵyndy talap etpeıdi, - dedi depýtat.
Buǵan deıin Qazaqstan men Ózbekstan mádenı-gýmanıtarlyq yntymaqtastyq josparyna qol qoıǵanyn jazǵan edik.
