Zań magıstri: Beıbit jınalystar týraly jańa zań - azamattyq qoǵam qurýdaǵy mańyzdy qadam

ÓSKEMEN. QazAqparat – S. Amanjolov atyndaǵy Shyǵys Qazaqstan memlekettik ýnıversıteti qylmystyq quqyq jáne qylmystyq is júrgizý kafedrasynyń aǵa oqytýshysy Aksana Kalenova «QR-da beıbit jınalystardy uıymdastyrý jáne ótkizý tártibi týraly» zańǵa qatysty pikir bildirdi, dep habarlaıdy QazAqparat tilshisi.

«Halyq únine qulaq asatyn memleket» tujyrymdamasy beıbit jınalystar týraly zań jobasy qabyldanbaı júzege asyrylmaıtyny belgili. Elimizdegi qazirgi qoǵamdyq-saıası ahýal da osy turǵyda adam quqyǵyn durys retteý máselesin sheshýdi talap etedi. Memleket basshysy Qasym-Jomart Toqaevtyń beıbit jınalystar týraly jańa zań jobasyn ázirleý týraly tapsyrmasy der kezinde oryndaldy. «QR-da beıbit jınalystardy uıymdastyrý jáne ótkizý tártibi týraly» zań jobasyna Parlament Senaty engizgen ózgerister men tolyqtyrýlardy Májilis depýtattary qoldap daýys berdi. Zań jobasy sheńberinde saıasatkerler, ǵalymdar, jýrnalıster jáne quqyq qorǵaýshylar arasynda qyzý pikirtalastyń bolǵany da jasyryn emes. Árıne, jańa Zańdy ázirleý kezinde beıbit jınalystardy uıymdastyrý quqyǵynyń bostandyǵy men osy bostandyq ólshemi arasyndaǵy tepe-teńdikti saqtaý qajet boldy. Bir jaǵynan, memlekettik qurylymdardyń beıbit jınalystar bostandyǵyn negizsiz shekteýge jol bermeıtin, ekinshi jaǵynan azamattardyń beıbit jınalystar bostandyǵy quqyǵyn teris paıdalanýyna ákelip soqtyrmaıtyn naqty tetik kerek edi», - deıdi Aksana Kalenova.

Onyń aıtýynsha, Zańdy qaıta qaraý barysynda azamattardyń beıbit jınalystardy uıymdastyrý quqyqtarynyń saqtalýyn qamtamasyz etetin kóptegen túzetýler engizildi. Zań jobasyn ázirleýshiler Qazaqstannyń barlyq aımaqtaryndaǵy pikirtalastarǵa qatysyp, kóptiń sózine qulaq túrdi. Ashyq dıalogqa halyqaralyq uıymdardyń ókilderi de shaqyrylǵan.

«Atqarylǵan aýqymdy jumystyń nátıjeleri – beıbit jınalys túrleriniń ara-jigit ajyratý, beıbit sherýlerdi ótkizý týraly habarlama rásimderin engizý, mıtıngilerdi uıymdastyrý týraly habarlama berý tártibin jeńildetý, ony qaraý ýaqytyn qysqartý, beıbit jınalystardy ótkizý úshin ózara jaýapkershilikti belgileý boldy. Álbette, azamattyq qoǵam qurý ońaı sharýa emes. Osy zań jobasy jáne ony ári qaraı iske asyrý bul joldaǵy mańyzdy qadamǵa aınalyp otyr», - deıdi zań magıstri.