Zań kúshine endi: Dárigerlerge kúsh qoldanǵandar 12 jylǵa deıin sottalady
ASTANA. KAZINFORM — Búgin Qazaqstanda medıtsına qyzmetkerlerine qatysty fızıkalyq kúsh qoldaný men qorqytý áreketteri úshin jazany kúsheıtý týraly Memleket basshysynyń tapsyrmasymen ázirlenip, qabyldanǵan Qylmystyq kodekske engizilgen ózgerister kúshine endi.
Densaýlyq saqtaý mınıstrligi baspasóz qyzmetiniń aqparatyna sáıkes bul ózgerister Qylmystyq kodekske jańa bap engizýdi kózdeıdi.
— Atalǵan bap medıtsına qyzmetkerleriniń, sondaı-aq jedel medıtsınalyq járdem brıgadalary júrgizýshileriniń qyzmettik mindetterin atqarý kezinde olardyń ómirine, densaýlyǵyna jáne qaýipsizdigine qol suǵý úshin qylmystyq jaýapkershilikti belgileıdi, — dep túsindirdi vedomstvo.
Qujat normalaryna sáıkes:
• kúsh qoldaný qaýpin tóndirgeni úshin 200-den 500-ge deıin aılyq eseptik kórsetkish (AEK) mólsherinde aıyppul salý, ne sol mólsherde túzeý jumystary, ne 300 saǵatqa deıin qoǵamdyq jumystar, ne 2 jylǵa deıin bas bostandyǵyn shekteý nemese aıyrý jazasy kózdelgen;
• atalǵan áreketter aýyrlatatyn mán-jaılarda jasalǵan jaǵdaıda jaza kúsheıtilip, 2 jyldan 3 jylǵa deıin bas bostandyǵyn shekteý nemese aıyrýdy quraıdy;
• ómirge jáne (nemese) densaýlyqqa qaýipti emes kúsh qoldanylǵan jaǵdaıda 500-den 1000-ǵa deıin aılyq eseptik kórsetkish (AEK) mólsherinde aıyppul, ne sol mólsherde túzeý jumystary, ne 600 saǵatqa deıin qoǵamdyq jumystar, ne 2 jyldan 3 jylǵa deıin bas bostandyǵyn shekteý nemese aıyrý jazasy kózdelgen;
• ómir men densaýlyqqa qaýipti kúsh qoldaný 5 jyldan 10 jylǵa deıin bas bostandyǵynan aıyrý jazasymen, al aýyrlatatyn mán-jaılar bolǵan jaǵdaıda 7 jyldan 12 jylǵa deıin bas bostandyǵynan aıyrý jazasymen jazalanady.
Sonymen qatar, zańnamalyq ózgeristermen qatar medıtsınalyq uıymdarda medıtsına qyzmetkerleriniń jumys oryndaryndaǵy qaýipsizdigin kúsheıtý boıynsha qosymsha sharalar engizilip jatyr.
Budan buryn feldsherler ózin-ózi qorǵaý buıymdarymen qamtylatyny aıtyldy.
