Zań kúsheıgeli Qyzylordada 600-den astam moped tirkeldi

QYZYLORDA. KAZINFORM – 5 sáýirden bastap elimizde tirkelmegen mopedterdi paıdalanýǵa, júrgizýshi kýáliginsiz júrýge tyıym salyndy. Soǵan qaramastan Qyzylorda oblysynda qos dóńgelekti kólikti tirkeýsiz, saqtandyrýsyz jáne júrgizýshi kýáliginsiz basqarý deregi tyıylmaı tur.

Oblystyq Polıtsııa departamentiniń málimetine súıensek, óńirde jyl basynan beri 12 jol-kólik oqıǵasy tirkeldi. Onyń basym bóligi jol qozǵalysy kezindegi talapty saqtamaǵannan, jolda júrý erejesin buzǵannan bolyp otyr.

– 5 sáýirden bastap mopedter mehanıkalyq kólik quralyna teńestirildi. Sodan beri moped paıdalanýǵa tek polıtsııada tirkelgen, A1, A jáne B sanatyndaǵy júrgizýshi kýáligi, tehnıkalyq tekserýden ótken jáne azamattyq-quqyqtyq jaýapkershilikti saqtandyrǵan jaǵdaıda ǵana ruqsat etiledi. Zań kúshine engeli kámeletke tolmaǵandar arasynda moped tizgindeý jaǵdaıy azaıdy, – dedi departamenttiń Ákimshilik polıtsııa basqarmasy bastyǵynyń orynbasary, polıtsııa podpolkovnıgi Nurken Baqtııarov.

Zań talaby kúsheıgen soń oblys kóleminde 600-den astam moped tirkeldi. Qos dóńgelekti kólikti tirkeýsiz basqarǵandarǵa Ákimshilik kodekstiń 590-babynyń 2-bóligi negizinde 60, júrgizýshi kýáliginsiz basqarǵandarǵa 612-babynyń 2-bóligimen 62 ákimshilik shara qoldanyldy.

– 16-17 jasqa tolmaǵandar mopedti júrgizýshi kýáliginsiz basqarǵan jaǵdaıda Ákimshilik kodekstiń 612-babynyń 2-bóligine sáıkes 50 aılyq eseptik kórsetkish kóleminde aıyppul salynady. Al 16 jasqa tolmaǵan jasóspirimderdiń ata-anasyna Ákimshilik kodekstiń 127-babynyń 1-bóligimen 10 aılyq eseptik kórsetkish kóleminde aıyppul salynady, – dedi Nurken Baqtııarov.

Buǵan deıin biz 2025 jyldyń 5 sáýiri, ıaǵnı mopedterdi paıdalanýǵa qoıylatyn jańa talaptar kúshine engennen beri Almatyda 1,5 myńǵa jýyq motokólik mamandandyrylǵan aıyppul turaǵyna qoıylǵanyn jazǵanbyz.