Zań kompanııalary Úkimet múddesin halyqaralyq arenada qorǵaýǵa qanshalyqty qaýqarly
ASTANA. KAZINFORM – Halyqaralyq arbıtraj sottarda memlekettiń múddesin qorǵaıtyn otandyq zań fırmalarynyń áleýetin arttyrý myqtap qolǵa alynbaq. Bul týraly Ortalyq kommýnıkatsııalar qyzmetinde ótken brıfıngte Ádilet mınıstrligi Memlekettik múlik quqyqtaryn qorǵaý departamenti dırektorynyń orynbasary Dastan Smaǵulov aıtty.
Aıta ketsek, jýyrda Ádilet mınıstrligi alǵash ret Qazaqstan Respýblıkasy Úkimetiniń múddelerin shetelde bildirý jáne qorǵaý máselelerine arnalǵan halyqaralyq tájirıbelik konferentsııa ótkizgen.
«Konferentsııa qorytyndysy boıynsha otandyq zań fırmalaryna degen qajettilik arta túskenine kóz jetkizdik. Ásirese, ekologııa, salyq salalaryna bilikti zańgerlerdiń qajettiligi sezilip otyr. Táýelsizdik jyldarynan beri elimizde tájirıbeli zańgerler toby qalyptasty. Olardyń basym bóligi halyqaralyq daý-damaılarda ózderiniń biliktiligin dáleldep, memlekettiń múddesin qorǵaı aldy. Bul rette, Ádilet mınıstrligi halyqaralyq arenada memlekettiń múddesin qorǵaıtyn zańgerlerdi akkredıtteý máselesine basa mán berip otyr», – dedi Dastan Smaǵulov.
Otandyq zańgerler halyqaralyq arbıtraj sottarda sheshýshi ról atqarmasa da, kóptegen daý-damaılarda belsendilikterimen kózge túsken. Kóptegen kásipkerler qupııalyqty ári bıznestiń mártebesin saqtaý maqsatynda azamattyq-quqyqtyq daýdy tórelik arqyly sheshýdi jón kóredi. Bul rette, mınıstrlik ókilderi otandyq zańgerlerdiń qaı is boıynsha belsendilik tanytqanyn ashyp aıtpady.
Memlekettik múlik quqyqtaryn qorǵaý departamenti dırektorynyń orynbasary Erlan Musabaevtyń aıtýynsha, buǵan deıin otandyq zań fırmalarynyń qyzmeti shekteýli bolǵan.
«Halyqaralyq arenada otandyq zańgerlerdiń úlesi az deı almaspyz. Kóbine sarapshy retinde tartylady. Endigi jerde otandyq zań fırmalarynyń áleýetin arttyrýǵa kúsh salamyz», – dedi E. Musabaev.
Oralhan Qojanov
