Zań kómeginiń ortasha qunyn bilý úshin tarıftik keste engiziledi
ASTANA. QazAqparat - Zańgerlik kómektiń quny boıynsha ádil baǵa belgilenedi. Bul týraly Parlament Májilisiniń jalpy otyrysynda zań jobasyn talqylaý kezinde Ádilet mınıstri Marat Beketaev málim etti, dep habarlaıdy QazAqparat.
Jalpy otyrysta palata depýtattary zań jobasyndaǵy jańashyldyqtarǵa qoldaý bildirip, «Advokattyq qyzmet jáne zań kómegi týraly» zań jobasyn birinshi oqylymda maquldady.
«Zańgerlik kómektiń quny týraly ashyq aqparattyń joqtyǵy baǵanyń negizsiz kóterilýine sebep bolyp otyr. Osy oraıda halyqtyń habardar bolýyn jáne ádil baǵanyń belgilenýin qamtamasyz etý maqsatynda advokattar men zań konsýltanttary kórsetetin kómektiń usynymdyq sıpatta tarıftik kestesin ázirleý qarastyrylady. Bul Germanııa, Frantsııa, AQSh, Polsha, Chehııa jáne basqa elderdiń tájirıbesi.
Tarıftik kesteni engizý azamattarǵa zań kómeginiń ortasha qunyn bilýge jáne oǵan artyq shyǵyndy tólemeýge múmkindik beredi», - dep atap ótti mınıstr.
Budan bólek M. Beketaev búginde azamattardy teris pıǵyldy advokattar men zań konsýltanttarynan qorǵaý tetigi qarastyrylmaǵanyn sóz etti.
«Advokattar men zań konsýltanttary óz qyzmetin júzege asyrý barysynda senim bildirýshige eleýli múliktik zalal keltirýi múmkin.
Osy oraıda, advokattardyń, zań konsýltanttarynyń mindetti túrde óz kásibı jaýapkershiligin saqtandyrý engiziledi. Bul senim bildirýshilerge kásibı zań kómegin alýǵa kepildik beredi. Saqtandyrý ınstıtýty 2020 jyldan bastap engiziledi», - dedi vedomstvo basshysy.
Sonymen qatar Ádilet mınıstri advokatýrada jańa tehnologııalardy paıdalaný damymaǵanyn sóz etti. Bul máseleniń sheshimi retinde «E-advokatýra» aqparattyq júıesin qurý men qalyptastyrý eskerilgen.
Foto: newshub.co.nz
