Zań kómegi sheteldikterge de kórsetiledi
Sonymen qatar, bizdiń eldiń azamattary da álemniń 48 elinde osyndaı qyzmet alý múmkindigin ıelenbek. «Azamattyq is júrgizý máseleleri jónindegi konventsııany ratıfıkatsııalaý týraly» zań jobasynyń negizgi jańalyǵy osy.
Ádilet mınıstri Berik Imashevtyń aıtýynsha, zań jobasynda kelisimge qol qoıǵan elder arasynda sot jáne sottan tys qujattardy tapsyrý, sot tapsyrmalaryn oryndaý, sondaı-aq, tegin quqyqtyq kómek kórsetý máseleleri boıynsha múshe memleketterdiń ýákiletti organdarynyń jáne dıplomatııalyq ókildikterdiń ózara is-qımylynyń jeńildetilgen tártibi de belgilenip otyr. Sondaı-aq qujatqa sáıkes, ýaǵdalasýshy memleketterdiń biriniń azamattary jergilikti azamattarmen birdeı negizde azamattyq hal aktilerinen úzindi kóshirmelerdi tegin berýdi talap ete alatyn bolady.
Mınıstr atalmysh zań jobasy boıynsha shetelde júrgen adamdarǵa azamattyq nemese saýda isteri jónindegi qujattardy tapsyrý suraý salýshy memlekettiń konsýlynyń ótinishi boıynsha, al azamattyq ister boıynsha qujattardy tapsyrý suraý salynatyn memlekettiń zańnamasy boıynsha quzyretti organnyń kómegimen júzege asatynyn atap kórsetti. Sondaı-aq, memleket óziniń egemendigine, qaýipsizdigine nuqsan keltiredi dep sanaǵan jaǵdaıda tıisti qujattardy tapsyrýdan bas tartýǵa quqyly.
Atalmysh konventsııa 1954 jylǵy 1 naýryzda Gaagada jasalyp, oǵan 48 memleket múshe eken. Olardyń arasynda Avstrııa, Armenııa, Belarýs, Germanııa, Egıpet, Italııa, Norvegııa taǵy basqa alys pen taıaýdaǵy shetelder bar. Bul konventsııaǵa qatysý Qazaqstanǵa azamattyq is júrgizý salasynda eki jaqty halyqaralyq kelisimderi joq memlekettermen áriptestik ornatýǵa múmkindik beredi. Bastysy bul qujattyń talaptaryn júzege asyrýdan memlekettik bıýdjetke shyǵyn kelmeıdi. Sonymen qatar ulttyq zańnamany da sáıkestendirý qajet emes.
Berik Májıtulynyń aıtýynsha, bul konventsııa Qazaqstannyń azamattyq ister boıynsha quqyqtyq kómek kórsetý máseleleri jóninde ratıfıkatsııalanyp otyrǵan 13-shi qujat eken. Budan basqa TMD sheńberinde elimiz azamattyq, otbasylyq jáne qylmystyq ister boıynsha quqyqtyq kómek pen quqyqtyq qatynastar týraly Mınsk jáne Kıshınev kópjaqty konventsııalaryna qosylǵan.
