Zań qabyldaýda senatorlar óz jaýapkershiligin umytpaýy kerek - Bektas Beknazarov
NUR-SULTAN. QazAqparat – Senat tóraǵasynyń orynbasary Bektas Beknazarov qabyldanatyn zańdar boıynsha depýtattar óz jaýapkershiligin umytpaýy kerektigin málim etti, dep habarlaıdy QazAqparat tilshisi.
«Senat qabyrǵasynda qabyldanǵan zańdardyń qanshalyqty jan-jaqty, tııanaqty túrde talqylanyp, durys zańyń qabyldanýy úshin jaýapty adamdardyń nazaryn aýdaratyn másele dep esepteımin. Bizdiń búgingi parlamenttik tyńdaýymyzda Úkimetke de, sonyń ishinde Ádilet mınıstrligine de, memlekettik organdarǵa da birshama syn aıtyldy. Onyń barlyǵy, árıne, durys. Biraq, qurmetti áriptester, barlyǵyńyzdyń nazaryńyzdy taǵy bir nársege aýdarǵym keledi. Zańdy qabyldaıtyn kim? Qandaı organ osy zańdardy qabyldap otyr? Shala bolsyn, asyǵys daıyndalǵan bolsyn, bul zańdardy qabyldap otyrǵan bir organ, ol - Parlament Senaty. Ol - bizdiń óz jaýapkershiligimiz. Eger qabyldanǵan zań zaman ári ýaqyt talabyna, adam quqy talabyna sáıkes kelmeıtin bolsa, onda oǵan, eń aldymen, kináli - osy zalda otyrǵandar», - dedi senator Parlament Senatynda zań shyǵarýshylyq protsesti jetildirý taqyrybyna arnalǵan parlamenttik tyńdaýda.
Osy oraıda B. Beknazarov úlken kodeksterdiń ózi qabyldanǵan kezde aldyn ala boljamy joq qadamdar oryn alatynyn sóz etti.
«Mysaly, biz osydan biraz jyl buryn Ákimshilik quqyq buzý kodeksin qabyldadyq. Osy kodeksti talqylaǵan kezde kóptegen normalar boıynsha, ıaǵnı tártipti nyǵaıtý máselesinde úlken somaly aıyppul belgilendi. Ol myńdaǵan adamdardyń taǵdyryna áser etti. Sodan keıin bir-eki jyldan keıin aldyq ta, sol aıyppuldardyń shamasyn eselep turyp azaıttyq. Sóıtip jan-jaqty daıyndalmaǵan sheshimge bardyq», - dedi ol.
Osy oraıda senator alda taǵy da úlken zańdar toby kele jatqanyna toqtala kele:
«Sondyqtan, qurmetti áriptester, synaýǵa bolady, aıtýǵa bolady. Biraq osynda otyrǵan áriptesterimniń nazaryn taǵy da aýdarǵym keledi. Eń aldymen, osy zańdardyń qabyldanýyna, durys sapaly bolýyna halyqtyń, Prezıdenttiń aldyndaǵy ózimizdiń jaýapkershiligimizdi esten shyǵarmaıyq», - dedi Bektas Beknazarov.
